返到酒店，快快趣換過泳衣即刻跳落酒店泳池喇～
可能宜家都仲係布吉嘅淡季，所以都好少人游水～ 好舒服！
Sunwing有兩條滑水梯～ 呢條係短果條～
呢條就係長果條喇～ 轉一個圈先落嚟㗎～
玩得幾次Yuki發覺啲水會沖入鼻哥～ 所以變咗鍊住個鼻嚟滑～ 哈哈！
Splash! 入水喇！
上一堂游泳班教過下跳水～ 今次過到嚟布吉Yuki即時要實習下先～
大家估下跟住落水係點呢？
動畫片段～ ＯＫ㗎！
旅行其中一樣令人放鬆心情同享受悠閒時光，莫過於喺泳池邊慢慢享受著地道嘅美食！
Daddy同Yuki各自各精彩！ 嘻嘻～
Yuki仲好大方咁同Mommy分享支甜筒添～
喺咁嘅環境，加埋咁靚嘅天氣，真係日日遊、日日玩都唔會厭呀！
好嘞！享受還享受，都要睇住時間返房梳洗喇！
因為我哋今晚訂咗枱去海邊餐廳Lotus食晚餐呀～ 我哋早一個月已經嚮網上登咗枱㗎喇～
去到見到真係留咗張最外面第一排嘅海邊枱俾我哋～ 好嘢！
到達時間五點四十五分，太陽準備收工～ 根據網站資料，宜家嘅日落時間係六點半左右～
開頭去到Yuki剛剛喺車瞓著無幾耐，所以仲有少少扭計～ 過咗幾分鐘就無嘢喇～
不過仲有少少眼腫腫喎～
呢間餐廳嚟到嘅人客九成都係先影相～ 啲侍應又好好，唔會催你落單㗎～
好快就過咗九個字～ 到六點半喇～
太陽伯伯收工喇～ 好靚呀！
啲雲反射到金黃色呀～
呢個時候，每張枱嘅視線都係一致地望住日落～
唔該waitress姐姐幫我哋影咗張全家合照呀～
趁天未黑齊，影低Lotus個招牌俾大家認住喇～
到啲嘢食嚟到嘅時候個天已經黑齊哂，所以無影到食物嘅相呀！ 呢間餐廳啲食物都幾好味㗎～
Yuki最鍾意係果杯Ice-cream shake！
海灘上面有人放煙花、又有人放孔明燈添～ 仲有玩箭頭直升機添～
不枉我哋早一個月訂定位～ 下次再嚟布吉的話應該都會再嚟過～
Day 2活動完結～
Yuki跳水好精彩啊！
回覆刪除