因為今日要轉酒店，所以今日無day trip行程~
可以輕輕鬆鬆咁食埋喺Ｓunwing最後一日嘅早餐～
Yuki咁鍾意啲泳池，當然唔會放過任何一個機會，Check-out之前都要玩多一次喇～
Yuki無論水面同水底都係好一致嘅舉高雙Ｖ甫士～ 嘻嘻！
游完返上房，快快趣梳洗埋就check-out喇～ Bye Bye! Sunwing Resort Kamala Beach! We will be back!
今日將會入住嘅另一間酒店係Centara Grand Beach Resort～ Sunwing喺Kamala區～ Centara喺Karon區～ 揸車距離16km，唔算遠～
不過未咁早未有得check-in，所以我哋中途先喺巴東海灘一帶停一停先～
巴東海灘應該係成個布吉島最熱鬧嘅地方～
有好多食肆，舖頭，商場～ 夜晚就會有好多酒吧添～
我哋先將㗎車泊喺帆船商場個停車場，跟住就沿住呢條街搵我哋今日食晏嘅目標餐廳～
見到有人龍排緊隊呢間就係喇～
６號餐廳（No. 6 Restaurant) 宜家出哂名～ 呢間餐廳係食地道泰國菜嘅～ 佢除咗外國人多之外，宜家香港人又多，韓國人仲多～
呢間係舊舖，佢哋仲開咗間新分店～ 不過新店好似話啲嘢無呢間咁好食～
食地道嘢，當然唔少得叫個泰式炒飯、泰式炒河，再加埋個肉碎奄列蛋喇～
好！食完晏再週圍行下先～
好似話呢度附近就有傳聞中好味到要打包上飛機帶返香港嘅芒果糯米飯喎！
咦！ 似似地係呢個牌喇喎～
望埋個門口～ 同之前睇人哋遊記嘅相一樣嘅～ 係呢間喇！
買咗個芒果糯米飯外賣，跟住行返去帆船商場～ 搵個地方坐低食先！
布吉所有嘅麥當奴叔叔都係呢個Sawadee krab動作㗎！
喺帆船商場又見到Yuki最愛嘅Swensens喇！
一路食Swensens雪糕，一路食芒果糯米飯～ 正！
帆船商場呢度好似係有幾個商場～ 中間有好大嘅天幕連接住～
就算落大雨都唔使驚！
背後就係帆船商場裏面唯一嘅帆船嘞～
行幾行～ 時間差不多可以去Check-in喇～ 由巴東揸車落Karon，十分鐘左右就到㗎喇～
布吉大部份酒店如果自駕都有得俾你泊車，唔使收錢～
Check-in唔使坐埋去counter搞～
坐喺呢邊一路飲住welcome drink，一路check-in～ 嘆！
上房喇～ 呢間酒店好大，有四座係客房building，我哋住喺第二座～
最基本嘅房間都係ocean facing room～ 有個浸浴嘅浴缸添喎～
從露台望出去就見到Karon beach㗎喇～
喺房休息一陣我哋出發揸車向南下，慢慢向我哋今晚打算食海鮮嘅Rawai beach進發～
中途無心插柳經過Karon View Point～ 即刻停低架車行一陣先～
Yuki戴自己嘅太陽眼鏡都唔夠，戴埋Mommy果對都幾好睇播～
呢個方向望返過應該就係巴東海灘～
好快就落到嚟Rawai beach喇～
據網上資料所得，嚟呢度食海鮮最好下午先嚟一轉趁海鮮款式仲多嘅時候買咗先～
一袋袋嘅鮑魚～ 由百五泰匹至二百泰匹一袋～ 我哋買咗袋連殼嘅，二百泰匹！
呢檔有啲蜆呀，螺呀～ 不過我哋無買～
然後再買咗兩隻瀨尿蝦同三隻虎蝦～
Yeah! 買好海鮮喇～ Yuki似唔似去街市幫手買餸嘅小助手呢？
海鮮檔對面有好幾間餐廳，可以幫你加工煮海鮮～ 呢間Mook Dee好多香港人幫襯過都話唔錯～ 我哋講低每種海鮮要點煮法，同埋我哋幾點返嚟食，佢寫低張紙俾返我哋就搞掂～
中間呢段空檔時間，我哋揸返架車去日落崖睇日落～
泰國嘅廁所原來要收錢㗎～ ５泰匹去一次～
睇到日落崖喇～ 不過時間尚早，太陽仲喺幾高喎～
Yuki與Mommy傾下計，玩下，打發時間～
等下等下～ 逐漸唔少本地人同遊客都嚟到等睇日落喇～
好！睇下睇下～ 夠鐘返去食海鮮喇～
日落之後，返到嚟～ 啲海鮮檔同餐廳都開哂燈～
嗱！ 認住呢間就係Mook Dee餐廳喇～
除咗自己買嚟呢三樣海鮮，我哋再叫咗碟炒河～ 夠喇！ 因為仲要留肚食宵夜～
揸車返酒店之前，我哋要再食食食！ 去返巴東海灘附近～
入夜後多咗好多街邊小食檔呀！ 呢間買隻燒雞脾～
另外呢檔買香蕉班戟～
再加埋encore嘅芒果糯米飯！
嘩！呢個宵夜真係豐富呀！
明日節目預告：越野四驅車！
沒有留言:
發佈留言