布吉遊－Day 3 (8/28): Sea Canoeing

第三日朝早一瞓醒就聽到好大嘅雨聲～　點算呢？　今日仲要出海玩喎～

但係真係落得好大下～　淨係影相表現唔到，俾埋片大家睇下～

橫掂落雨，食完早餐周圍行下喇～

Sunwing除咗有七個泳池之外，都仲有個設備齊全嘅Gym喇～

另外就係一個好大嘅Kid's area~ 有得托兒添喎～

行埋出去海灘先～　由酒店行Kamala海灘好近，五分鐘左右就行到出去～

不過掛咗紅旗，不宜游泳～　但係一場嚟到，點都落水濕下腳喇～

行返到酒店已經好天返喇～　布吉嘅天氣真係可愛～

今日報嘅團係中午先出發，所以我哋朝早選擇繼續喺酒店游下水先～

Yuki練成咗喺水裏面唔使戴泳鏡睜開眼呀～　Hello!

游咗一個鐘左右就返房準備出發今日嘅主要行程喇～

好似尋日咁，都係有人嚟酒店接送嘅～　所以我哋又喺大堂邊等邊影相～

尋日影咗一邊，今日影另一邊，Front desk嘅正面～

上咗車向東北出發～　今次呢程車要成個鐘～　去到一個碼頭落車～　我哋呢架算係最早到～　要等埋其他車接哂所有唔同酒店嘅團友～

呢個碼頭又係要行好遠先出到去坐船嘅位置～　睇嚟布吉嘅水都偏淺～　要去到好出先夠深泊船～

上齊哂船就有嘢食喇～　呢個係light lunch～　有炒麵同炸春卷，同埋啲水果～

船程又約莫要一小時～　呢架船幾大架～　可以去船頭甲板、船尾甲板、船頂甲板～　另外值得一提係呢架船係用四衝程引擎～　一般船都係用二衝程引擎，因為價錢平，但係壞處係有好多燃燒唔哂嘅油會隨處廢氣排返落海～　即係污染個海～

呢間叫John Gray's Sea Canoe嘅布吉元祖Sea Canoe係由一個美國人叫John Gray於1989年開立～　佢非常堅持對環境嘅保護，除咗從佢嘅船所選擇嘅引擎，亦可以從佢所有guide嘅表現感受得到～　容後再講～

船艙裏面呢個時候有其中一啲guide講解呢啲洞嘅形成同埋我哋今日要注意嘅嘢～　幅圖嘅左邊就係個洞嘅入口～　個入口位其實好窄，大概兩三呎度～　所以潮脹同潮退影嚮好大～　有時潮脹嘅時候要將架canoe放少少氣等佢低少少先出入到㗎～

講下講下已經到目的地附近喇～

呢個範圍都叫攀牙灣～　嚟到有另一架都係John Gray嘅船喺度～

今日我哋其實好好彩～　因為我哋有幸見到John真人～　其實佢唔係日日隨團出動㗎喇～　始終佢年紀漸大，六十幾歲喇～

我哋三個坐一架canoe～　由一個叫Toi嘅姐姐照顧我哋～

上咗艇喇～　Yeah!

好快就進入第一個洞口，要瞓低喇～

入到洞內，真正體驗到咩叫做「別有洞天」呀！

之後再去咗幾個洞～　下面呢個係最大最多人嘅～　可能因為啲水淺可以落去影相，所以真係超多人呀！

我哋無乜興趣迫，叫Toi姐姐帶我哋去第二度～　佢帶我哋離開個洞，搵咗個淺水地方俾我哋落地游水呀～

睇下後面啲石最近水果一部份就係潮脹同潮退嘅高度差別嘞～

Toi姐姐就係用一支槳就撑我哋周圍去喇～　之前講開佢哋每個guide都好有環保意識～　佢哋撑撑下如果見到有啲人為垃圾，即使唔知係乜嘢人留低嘅，佢哋係會執起之後返上船掉㗎～

Toi姐姐上返船先，跟住俾我哋自己試下撑，體驗一下～　Yuki都真係有撑過㗎～

上返船準備下一個節目喇～

途經呢個好似占士邦島嘅孖生細佬～　呢個好似保齡球樽～

下一樣節目就係由我哋嘅guide教我哋做個Krathong~ 係用嚟拜神、祈福之類嘅時候用㗎～　主要材料係香蕉相關物品～　個底座係香蕉樹切開，另外有蕉葉～

Yuki做呢啲最有心機㗎喇～

有佢幫手，話咁快就由做得七七八八喇～

姐姐佢哋好勁呀～　可以將啲花入面果部份整隻雀仔出嚟！

同師傅合照返張製成品先～

跟住到Daddy Mommy又要影～

整好個Krathong之際，晚餐已經準備好喇～　　嘩，好豐富咁喎～

所有人嘅Krathong都放咗喺枱嘅另一邊～　呢個就係Yuki整㗎喇～

呢個晚餐真係好好味～

一路食晚餐，太陽開始落山喇～

即刻上船頂甲板睇日落先～

嘩！又黃、又金、又紅、又紫、又藍！　同尋晚嘅Lotus餐廳相比又係另一種靚～

到完全入黑後，我哋又入去一個洞裏面去放個Krathong落水喇～

放完幾分鐘，當然唔會就咁落低係度變成垃圾喇～　我哋收返上船，跟住帶返酒店㗎～

離開個洞之前，仲體驗多一樣嘢～　喺全黑嘅狀態下，當我哋拍打水面時，居然有啲微弱嘅閃閃白光～　有少少似螢光蟲咁～　但係就好多好密，好似水面有好多好細嘅魚一齊跳離水面咁～　據John講，呢啲好似係一種生物，因為想引開捕食者嘅注意而發生嘅現象～　　好得意！

最後，我哋要中途就同John講bye bye喇～　因為今日有其中一個團友係報咗兩日一夜團，所以John會陪佢喺其中一個島個營地過一晚夜～

Thank you so much！好多謝佢咁用心啲對呢個咁靚環境嘅保育呀～