不在香港的日子 (最終回)

Yuki～　Daddy今次呢個blog係第一次o係機場候機室寫架～

點解呢? 因為Daddy搭班機delay左呀～　原本２３：３０，宜家要００：０５～　所以宜家o係孟買機場候機室無所事事下，就為Yuki你個blog寫篇‘不在香港的日子（最終回）’喇～

估唔到第一次搭馬航來回孟買就要delay，下次真係要好好考慮下搭邊間先得啦～

順便介紹下孟買機場，其實係一個好細既機場，４個登機閘口共用一個候機室，無商品，無野行，得個細細個既檔仔賣汽水～

另外你地估下呢個人企係度做乜呢？　佢係度叉緊手提電話既電呀，Airtel係一間網絡商，特登整個有唔同電話牌子既叉電插頭俾人用，又幾好喎～

好啦～　上機喇，瞓番陣先～

呢篇blog橫跨兩日，daddy宜家已經係吉隆坡返香港既途中喇～　剛剛係吉隆坡機場好緊張呀～我地本來有成兩個鐘轉機，但係因為delay成個鐘有多，所以得番一個鐘左右，仲要今次馬航要我地係吉隆坡先可以出到番香港既登機證～　嘩！乜咁多人架！

本來諗住可以坐低食個早餐先上機，最後唯有兵分兩路，我去BurgerKing買野，我同事去拎登機證喇～　拎左登機證，急步走去登機閘口，用左五至十分鐘食左個Whopper餐（因為有汽水，宜家唔可以帶上機）～　好飽～

返香港呢程機好少少，起碼有私人電視，Daddy睇左套虎膽龍威（四）～　第日同Yuki你搭飛機可以開個兒童台俾你睇架～

好啦，開始要降落啦，Daddy要收埋電腦喇，一陣見啦，Yuki～