星馬６天遊之Adventure Cove Waterpark (Jul 28)

一早起身，Daddy先要享受一下房裏面免費提供嘅Nespresso～　第一次住酒店有咁好設備～　有四個不同濃淡程度嘅capsules任揀～

出發去食早餐～　嗱～　酒店對出就係呢隻巨型魚尾獅（Merlion）嘞～　雖然咁近我哋，但係我哋住足三晚最後一次都無上過去～

因為我哋訂嘅酒店房價唔包早餐，所以我哋行咗去Resort World果邊搵早餐食～　有McDonald, ToastBox之類～

呢排McDonald紀錄唔好～　所以我哋都係去吐司工房穩陣啲～

嚟到新加坡當然要食㗎央多士喇～　不過Sentosa嘅Toast Box比起新加坡市區果啲都貴幾多～　一個餐Sentosa賣S$7.1市區先賣S$4.8，差不多貴咗５０％呀～　　

如果夠時間搭兩個站出返Sentosa Station個Vivo City食應該平返啲～

　

好喇～　今日嘅重點遊玩項目就係Sentosa裏面嘅Adventure Cove Waterpark水上樂園喇～

喺入口呢幅相係Yuki忽然唔想影相～　既然Yuki唔影就幫我哋影喇～　

都影得唔錯喎！

呢度有大locker同小locker可以租用～　我哋租個大嘅六個人嘅嘢都可以放哂落去～　S$20蚊一日～　無限次數開啟～　不過大locker數量唔多～　想租要趁早入場～

第一樣玩下呢度條lazy river（正式叫adventure river）好吸引喎～

全條河足足可以玩成２０分鐘㗎～

Yuki玩得幾lazy~ 瞓哂喺度想掹住人飄流喎～

另外一啲特色好似有一段會經過園內嘅水族館部份～　舉高頭就望到啲海洋生物喺頭頂經過～

另外一啲區域就隔住塊玻璃可以見到啲魚喺側邊游過～

Yuki同嫲嫲家姐合照都無嚟正經咁舉高隻腳～　但係睇得出佢哋又笑得好開心喎～

除咗lazy river，另外不可或缺嘅當然有呢種爬高爬低，有幾條滑水梯仔，同定時倒水落嚟嘅大水桶喇～

呢！Yuki同Mommy喺上邊排緊隊喇～

跟住嚟到呢個人造浪海灘～　剛剛啲浪玩到尾聲～　玩咗一分鐘左右就停，回復風平浪靜～

既然風平浪靜，唯有自己搵啲嘢玩下喇～　例如水底擺甫士！

跟住呢個係咩呢？　好遠好遠果度好似有條滑梯咁嘅物體喎～

無錯～　呢條就係Dueling Racer～　係有塊類似乳膠氈俾你揸住用嚟滑落嚟減少阻力，加快速度～　不過Yuki唔敢玩～　

所以得Daddy Mommy同家姐玩～　落緊嚟果兩個就係Mommy同家姐嘞～

仲有呢個有４米深嘅Splashworks～　有啲平衡木，繩網陣～　仲有兩個跳水位～　其中一個成層樓咁高～　我哋當然無跳喇～

喺水上樂園玩到３點左右我哋就走喇～　

經過個mall Mommy見到有gelato即刻捉埋Yuki入去～

Yuki都話去旅行其中一樣最開心就係可以成日食雪糕囉～

返到酒店又有啲時間剩喎～　

咁我哋去酒店個泳池又游返一陣先喇～　順便為大家介紹下呢間酒店喇～

Movenpick呢間酒店原址建於１９４０年～　當時係英國殖民地嘅兵營～　所以舊翼呢座建築好有古舊建築風～

呢個泳池就建於新舊翼中間～　唔算係好大～　不過幾特別，泳池邊係玻璃嚟㗎～　好似喺個大金魚缸入面游水咁～

成個池都係得兩個人游緊～

Yuki好享受喺呢個游池嬉水咁喎～

Yuki同家姐玩到攬頭攬髻咁幾開心！

游多一陣我哋就返上房換裝準備今晚嘅節目喇～