星馬６天遊之Legoland Waterpark (Jul 30)

行程進入第４日～　我哋要停暫離開新加坡喇～

（呢日篇幅較長，請耐心閱讀）

預先訂好嘅包車準時８點半到達Movenpick Hotel接我哋～　由新加坡去馬來西亞新山袛係四五十公里～　

包車去新山另一好處就係過關袛需要安坐車中就得㗎咋～　行李唔使拎上拎落～

過咗關之後好快就見到呢個路牌～　　Legoland!　我哋嚟喇～

嘩！好七彩繽紛嘅Legoland hotel呀～　好似在夢境咁～

係喎～　提醒一下大家，如果諗住包七人車的話，而你又有三四件大行李兼要坐足哂啲座位，咁就最好搵架大七人車～　例如Toyota Alphard～　如果唔係個車尾未必夠放哂啲行李㗎～

俾大家做個參考，呢度就係我哋包架Alphard可以打直放大行李喼㗎～

門口有Lego做門神保護酒店～　包保安全～　嘻嘻！

入到酒店大堂～　周圍都係Lego呀～　不論男仔女仔都好鍾意呀～

Daddy負責去check-in～　其實咁早嚟到預咗未有房㗎喇～　不過check-in主要嘅目的係拎Legoland嘅入場券同埋可以寄存低啲行李先～

Yuki同家姐好識把握時間喎～　眨下眼就砌好佢哋個名喇～

酒店package包咗兩日嘅Legoland入場券～　Legoland同Waterpark兩邊兩日內無限次出入～　我哋決定咗第一日先玩Waterpark～　因為玩完可以返酒店沖涼嘛～　　入場果陣天氣都仲幾好…　點知後來…

Waterpark嘅更衣室外面有幾排儲物柜～　有大size同細size～　如果一家人必定揀大size，因為真係大好多㗎～

５０蚊馬幣用足一日～　中間無限次數開啟～　可以揀用指模開或者用密碼開～

大locker有成半個人咁高～　我哋六個人嘅嘢都放得落～

第一樣玩嘅唔係下面呢個遊玩設施～　係喺下面果條飄流河～

Legoland連水泡上面都可以砌Lego喎～　

哎呀！　有人拎Lego撥水呀～　救命呀～

幣！　個天無喇喇咁黑嘅？　蓋過哂個酒店上嘅天空呀～

我哋喺飄流河玩緊第三四圈，跟住開始落雨，仲有雷暴～　救生員即刻截停所有活動～　要喺緊急通道離開飄流河～

雨愈落愈大～　我哋去咗快餐區避雨～　橫掂唔知要等幾耐，索性排隊買埋嘢食晏吧喇～

Legoland嘅杯杯盒盒都cute過人～

呢日我哋嘅午餐就係炸雞同漢堡飽～　馬來西亞洗費比起新加坡平～　成個四人Combo meal都袛係五十幾蚊馬幣～　即係百幾蚊港紙咋～

但係食完哂嘢雨勢都無減弱嘅跡象～　望住個人造海灘….

之前聽人講Legoland每日都會落一陣好大嘅雨～　落一陣就停㗎喇～　

點知呢場雨，落咗個幾鐘都未停～　咁等法都唔係辦法～

我哋冒著雨行返酒店，諗住換返衫過去Legoland果邊玩～　

點知呢個時候雨終於停咗～　我哋幾個決定再返入Waterpark玩過～　

先玩呢個大水泡可以六個人一齊玩～　仲有用架機送啲水泡上嚟，唔使自己拎架～

喺呢邊又望到酒店呀～　我哋再玩咗紅黃色果條滑水梯可以坐三個人嘅水泡～

但係點知玩咗唔夠廿分鐘….又再雷暴呀！　又要暫停呀！

等到悶悶哋～　有個小朋友娛樂大家～　將件救生衣當帽戴～　Yuki話自己係「法老王Yuki」喎～

如是者又等停雨等咗四十五分鐘左右～　

又再玩得喇～　

今次Yuki都要挑戰飛氈滑水梯～

呢條梯嘅位置成個Legoland Waterpark睇哂～

上到頂每人一格，大家準備好就One Two Three一齊起步～

滑落嚟就係咁㗎喇～　Yuki話要玩多十萬次呀～

頭先暫停之前玩紅黃色滑水梯係Daddy家姐同Yuki~ 今次換上Mommy家姐同Yukii喇～

紅黃梯隔離有呢條兩人滑嘅橙色梯～

重嘅坐前面，輕嘅坐後面～　今年Yuki大個咗高咗～　比起上年去長隆水上樂園嘅時候，好多遊樂設施都夠高玩喇～

愈玩愈好天～　玩到五點零鐘差不多夠皮～　臨走Legoland影相哥哥幫我哋影咗幅靚相呀～ Thank you!

返到酒店終於有房喇～

我哋呢間係Adventure Themed Room～

呢度房間特色係每間房都有間開另一間小朋友房～　有張碌架床～　另外有部小朋友房自己嘅電視機～

房間另一特色係洗手間有兩個洗手盆～　有個正常高度～　另外呢一個係小朋友高度～　唔記得叫Yuki企過嚟對比下個高度添～

仲有仲有～　每個房間都有個夾萬～　

跟住一張問題紙去答四條問題，個答案就係開啟夾萬嘅密碼～

真係開到喎！　裏面嘅寶藏係…

三包Lego玩具呀！　好正呀～

跟住我哋就出發去食晚飯～　我哋book咗架車載我哋去一間叫「蔡記海鮮」～

中途見到雲層中間有個窿有啲大陽光穿透出嚟～　好特別呀～

呢間蔡記海鮮都幾出名～　我哋去到都有坐咗一半～

呢度嘅蟹有三種做法都出名～　有黑胡椒蟹、辣椒蟹、同鹹蛋黃炒蟹～　之前Roland Restaurant食咗辣嘅蟹～　今日食返個唔辣嘅鹹蛋黃炒蟹喇～

除咗味蟹～　我哋仲食咗雞翼、福建炒麵、啤酒骨、麥片蝦、蝦婆、菜、同埋檸檬味Tiger Beer~

呢晚食得滿足，價錢又平又好食～　食飽打電話俾包車個司機，５分鐘就嚟到接我哋返酒店～

間酒店有間咁特別嘅房～　所以Yuki呢晚就選擇咗去爺爺嫲嫲房同家姐兩個瞓間小朋友房嘞～　Good Night!