前一晚Yuki約好咗爺爺嫲嫲同家姐話第二朝七點半要落去泳池游多一次水先走～
呢朝Daddy瞓醒望下窗外～ 見到個天啲雲好靚剛剛天光～
跟住叫Yuki落去游水喇～
落到泳池～ 太陽啱啱喺大廈之間見到～ 晨曦嘅太陽光線真係令人心情開朗～
加上泳池非常清靜～ 得兩個人喺度游咋～
望返上去，呢個就係我哋酒店嘅外觀喇～
爺爺嫲嫲一向慣咗早起～ 準時八點半喺泳池出現～
家姐都好好喎～ 唔游水都一齊落嚟坐下，聽歌～
咁～ 唔知大家估唔估到Yuki有無落到泳池游水呢？ 大家下次見到Yuki自己問佢喇～
游完水～ 先出發喺附近商場食早餐～
睇咗咁多日遊記，相信大家都估到我哋會食乜嘢㗎喇！ 無錯～ 咪係亞坤囉～
我哋仲喺呢個商場先買咗部份手信先～ 就係BengawanSolo嘅斑蘭蛋糕～
Yuki喺另一間舖頭見到呢樣好新奇嘅玩具～ 其實呢條係扭計蛇～ ７０後嘅人應該實有接觸過喇～ 當年可口可樂有得換㗎嘛～
買咗少少嘢，先返酒店Check-out咗先再出去烏節路行下街喇～
由Oasia酒店搭ＭＲＴ過Orchard袛係兩個站咋～ 好近～
烏節路不斷喺度變緊～ 有好多新嘅商場～ 好彩，依然仲見到啲歷史悠久啲嘅建築物啫～ 好似下面影嘅邵氏大廈～
呢個ION Orchard門口，三年前同公公婆婆嚟都有影過㗎～
行下行下～ 居然俾我哋見到有個伯伯喺度賣雪糕三文治呀～ 之前喺Clark Quay河邊果晚已經想食㗎喇～ 但係果晚太多人排哂隊，所以無食到～
今日居然無心插柳之下見到喎～ Lucky!
呢兩件係芒果同紅荳～
為食嘅人係唔會顧儀態嘅～ 一買咗見隔離有幾級樓梯就坐低即刻食喇～
好～ 跟住再沿烏節路行下又睇下嘢～ 睇下又影下～
行到去Somerset站附近差不多時間要食晏～ 因為要預返啲時間買多少少手信就返酒店等車～
喺Somerset嘅附近有呢間出名嘅海南雞飯餐廳，叫「百勝廚」～
我哋叫哂幾樣星加坡招牌菜：海南雞、燒雞、叻沙、蝦麵、珍多冰～
另一個無心插柳～ 原來之前喺香港見到介紹全球十大好食即食麵頭幾位係星加坡出㗎～
嚟到新加坡都無專登去搵～ 點知等緊嘢食果陣周圍行下就見到啲好熟口面嘅包裝喎～
原來就係百勝廚出嘅即食麵喇～ 即時入手買返幾包返香港喇～
食完即刻去返ION Orchard買埋林志源肉乾～
嫲嫲好勁呀～ 朋友多～ 手信都買得多～
同埋再加碼買啲斑蘭蛋糕～
返到Oasia酒店～ Pack好埋啲手信～ 約好嘅車亦都嚟到喇～ 呢架車好特別～ 係貨Van改裝㗎～
安全到達機場～ 六位團友嚟返個大合照～
我哋預早咗啲嚟機場Check-in㗎～ 有原因㗎～
要搭Tram過去Terminal 3先知我哋做乜喎～
就係嚟玩呢啲大水喉？
無錯～ 之前Yuki睇過J2台灣節目「愛玩客」喺新加坡介紹過呢條喺機場嘅滑梯～ 一早已經講話要玩～ 所以專登預早啲嚟機場嘞～
呢度有兩條滑梯～ 一條一層樓高嘅係免費～ 另一條三層樓高嘅就要消費１０蚊以上可以玩一次～ 加埋Yuki有幾個小朋友喺一層高呢條不斷重複地玩一次又一次～
好嘞！ 時間真係差不多喇～ 返過去Terminal 1過Immigration準備上機喇～
喺候機室嚟張今次行程last selfie先～
返香港呢一程算係多延誤～ 上機前已經因為機艙地氈有問題要整而遲咗登機～
跟住因為天氣關係（果晚香港有雷暴同閃電），排隊等降落香港～ 跟住降落咗又無泊機位要等～ 到泊咗埋泊機位都要等工作人員揸架登機橋過嚟俾我哋落機～ 最後我哋由六點上機到半夜十二點先喺香港落機～
不過最緊要平平安安出發、安安全全歸來～
今次嘅星馬６天遊亦完滿結束～
多謝爺爺嫲嫲賞面一齊參加呢個暑假遊～
多謝家姐陪足Yuki六日～ 希望Yuki一路長大都繼續痴住家姐！ 哈哈！
沒有留言:
發佈留言