又嚟到暑假旅遊嘅季節喇～
相隔四年，我哋再去新加坡呀～ 今年嘅行程仲加多咗一個四年前仲未開嘅主題公園－馬來西亞Legoland～
今次呢個暑假遊除咗Daddy Mommy同Yuki之外，我哋仲邀請到爺爺嫲嫲再加埋家姐同我哋一齊去玩添喎～
朝早八點幾嘅機～ 今次我哋唔搭機鐵去機場喇～ 而係坐四個轆嘅車～
因為加埋有成六個人，衡量過搭機鐵或搭的士去機場都唔平喎～ 所以今次首次包咗架七人車由屋企一程車直去機場～ 車程非常快，３０分鐘已經由炮台山去到機場喇～
Yuki期待咗好耐今次同家姐一齊嘅旅行～ 嚟緊六日可以成日痴住家姐一齊玩喇～
食埋個翠華早餐，又係時候要上機喇～
呢程機我哋mark咗三排孖位～ Yuki當然要孖住家姐坐喇～ Daddy Mommy第一次全程機唔需要照顧Yuki～ Yuki率先享受佢嘅child meal～
三個多小時嘅機程就到達新加坡樟宜機場喇～
我哋第一站入住聖淘沙嘅酒店～
四年前嚟果次試過自己搭ＭＲＴ出市區，發覺要轉幾次車～ 住聖淘沙仲要再轉多程Sentosa Express～加上今次同埋爺爺嫲嫲一齊，要大家咁辛苦搬住行李咁轉折好似唔係咁好～ 所以都係搭架Maxi Cab由機場直去酒店好啲喇～
Maxi Cab可以坐七至八個人～ 袛要去arrival hall呢個Ground Transport Desk話你要邊種車去邊間酒店～ 佢哋就會安排個number俾你～ 等五分鐘左右架車就到～
就係下面呢個Maxi Cab喇～ 係Benz嚟添㗎～ 不過要注意一點就係車箱兩排三坐位係對住嚟坐，即係有三個位係倒頭車咁坐～
聖淘沙嘅酒店我哋揀咗Movenpick Heritage Hotel～ 就喺Sentosa Express第三個站Imbian Station旁邊～ 對住隻巨型魚尾獅～
坐Maxi Cab唔使半個鐘就到酒店～ 相信如果自己坐ＭＲＴ，起碼要個幾鐘先入到聖淘沙～
入住聖淘沙嘅酒店記得喺check-in時拎張Sentosa Express任搭飛呀～ 如果唔係都要成SG$4一次㗎～
Check-in時酒店話未俾到房～ 唯有放低行李，先去食個午餐醫下肚先～ 搭返一個站去Waterfront Station個廣場有個馬來西亞食街～
裏面裝修到好似啲馬來西亞舊式建築～
不過人實在好多～ 搵位唔容易～ 搵到位再喺想食嘅檔排隊買食嘢～ 加加埋埋成半個鐘後先有得食～
行程第一餐我哋食咗海南雞、海南雞粒粒波飯、蝦麵、炒粿條、印度薄餅～
食飽要行返酒店之際～ Yuki發現有個玩水嘅地方喎～ 佢問准Mommy玩唔玩得之後，就開始戰戰競競咁逐少逐少咁由外面開始玩入去嘞～
當個人越濕越多嘅時候，個胆亦越嚟越大喇～ 於水柱叢之中都無有怕～ 哈哈！
小朋友忘形地玩嘅時候，笑容係最真最燦爛嘅～
令Daddy Mommy諗返起ＢＢ時嘅Yuki！ 嘻嘻～
呢啲開心樣真係你俾多多錢都買唔到～
返到酒店先拎到一間房～ 安頓好爺爺嫲嫲休息下先～ Yuki就要由濕變乾，換埋衫～ 跟住我哋自己先出去一趟牛車水去買嚟緊幾日嘅入場券～
之前喺網上資料搜集發覺好多人都係去到新加坡先喺一間本地旅行社買各項景點入場券～ 因為真係平好多下～
呢間位於唐城坊３樓嘅天宇旅遊喺香港各討論區非常出名～ 成個商場其實好多本地旅行社～ 但係排哂隊嘅係得呢間～
大部份票價都係原價七至八折左右～ 真係計計埋埋都慳唔少㗎～
不過記住帶夠現金去呀～ 袛收現金咋～
返酒店搵爺爺嫲嫲會合就出發去第一個主題景點：Night Safari
夜晚七點半開門～ 六點幾開始入得～ 近門口有間餐廳，我哋喺果度食埋嘢當晚餐～
食到中途啱啱有表演喎～ 係噴火同舞火把嘅表演嚟㗎喎～
跟住排隊入園喇～ 嘩，超多人呀！ 可能因為聽日係回教新年，亦係新加坡公眾假期，所以即使星期日晚都好多人入嚟玩～ 入到場都成八點半～
排個Tram Ride由隊尾要６０分鐘呀！ 排咗一輪，仲有４０分鐘～
好彩最後都係排咗大約半個幾鐘就上到車喇～ 呢程車繞住成個Night Safari行，足足成４５分鐘㗎～
坐完呢架車都成１０點～ 由於另外個show要成１０：３０先開始，太夜喇～ 兼且我哋約咗架車１０：３０接我哋～ 所以我哋喺啲shops行下～
Yuki食下雪糕～
跟住捐下錢俾野生保育基金～
玩完呢個Night Safari，Yuki終於都玩過哂Singapore Zoo同Night Safari喇～
沒有留言:
發佈留言