日頭玩完waterpark，呢晚我哋去食一間新加坡有名嘅辣椒蟹創始元祖餐廳！
間餐廳地點有啲偏僻～ 位於東岸對上少少，無ＭＲＴ站直接到～
我哋首先要搭ＭＲＴ去到一個叫Paya Lebar嘅站～
出站再喺巴士站等車轉乘巴士～ 嚟新加坡旅行第一站搭巴士咋～
新加坡地方大啲～ 巴士站都有櫈坐㗎～
Yuki為大家表演一秒極速變臉～ 上面果幅仲鬱鬱不歡咁，下一秒即刻變返頑皮笑臉喇～
上巴士再搭多六七個站到一個叫Parkway Parade站落車～ 然後沿著條車路再向海邊方向行五分鐘左右～ 見到有個多層停車場果度就係嘞～
好得意㗎！間餐廳喺個多層停車場最頂果層出～ 無其他舖頭㗎喇～
大廈外牆有間餐廳嘅招牌，仲有個老闆個樣㗎～
呢間餐廳叫做「Roland Restaurant 東皇大酒樓」
點解叫Roland Restaurant呢?
話說Roland嘅媽媽徐炎珍女士喺六十多年前發明咗辣椒蟹～ 及後呢道菜越來越受歡迎～ 佢哋亦喺６０年代於東海岸開咗間餐廳，直到８０年代移民新西蘭而將間餐廳頂手俾其他人～
後來佢哋重返新加坡～ Roland於２０００年同媽媽重新開始～ 開咗宜家呢間Roland Restaurant～ 當年報章都有所報導～
事隔十年，第三代目開始接手～ Roland嘅囝囝已經廿幾歲，開始接手呢間家族承傳落嚟嘅酒樓～
我哋呢晚叫咗辣椒蟹、饅頭、無錫骨、腐皮豆苗～ 個辣椒蟹真係好好味～ 連Daddy唔食得辣嘅都食到唔停得手～
滿足地掃清枱上所有美食之後，我哋繼續今晚另一項節目－遊船河 Singapore River Cruise～
因為間酒樓地點太轉折，所以我哋搭的士直接去Clark Quay碼頭～
唔使等好耐剛好有架船返嚟喇～
人唔算好多～ 可以坐得舒舒服服～
經過Merlion～ Yuki話要睇下魚尾獅嘅正面喎～
因為前一次嚟喺岸上面影唔到前面呢個樣㗎～ 今次可以睇得好清楚嘞～
沿途仲會經過Boat Quay，Fullerton Hotel，Marina Bay～ 全個船程約４０分鐘～
啱啱去到Marina Bay Sands hotel嘅時候，正好開始每晚嘅光影水幕表演(Wonder Full light show)
真係約都無咁啱呀！ 船長將架船停低～ 另外都見到有兩三艘好似我哋呢啲觀光船都停低喺度睇～
雖然喺香港已經成日睇幻彩詠香江，但係去到外地睇類似嘅表演，始終都係有新鮮感～
睇完個show，開始回程返去Clark Quay~ 第二日嘅行程亦告一段落～
沒有留言:
發佈留言