成晚不停咁落雪～ 今朝起身外面嘅積雪比尋日更多～
今日係Boxing day~ Yuki好心急想知道Santa Claus送咗咩禮物俾佢呢？
嘩！係Yuki近期最愛嘅Frozen同埋一直都鍾意嘅Jewel Pets呀！
今朝早餐依然係我哋包場～ 其實日式早餐營養都應該幾均衡同健康～ 起碼唔會有餐肉呀、公仔麵、腸仔之類無咁健康嘅食物呀～
換好衫後，小朋友每朝嘅熱身運動－就係酒店門外玩雪喇～ 對於Yuki呢啲喺亞熱帶地區長大嘅小朋友，見到真雪就自自然然好興奮、好雀躍～
酒店門口望上去已經係一片白茫茫嘅街道～ 喺度會見到啲平時喺街見唔到嘅境象～
例如有小朋友坐住雪兜俾Daddy拖住就咁喺街度滑行！
今日我哋嚟到赤倉另一個滑雪場－赤倉觀光リゾート（赤倉觀光Resort）
因為呢個滑雪場同尋日果個赤倉溫泉其實係相連嘅～ 左邊係赤倉觀光，右邊係尋日嘅赤倉溫泉～ 而睇個圖好似赤倉觀光唔係咁多條雪道，所以我哋買咗兩邊都滑得嘅共通券～
今日氣溫零下６度～ 繼續係落雪嘅天氣～ 積雪居然有260cm～ 即係有十幾尺厚呀！
原來咁樣瞓哂身落啲雪度又真係幾舒服㗎喎～ 啲雪真係軟綿綿㗎～
上山第一個lift係gondola～ 唔使吹風，可以除鏡喺裏面慢慢影～
落咗lift呢度一落就係紅色雪道～ 不過相比起上年苗場嘅紅色，呢度又唔算係太斜咋喎～
定係我哋技術好咗呢？ 因為今年大家都跌少咗呀！
可惜今日天氣都係唔太好～ 所以滑緊嘅時候都係無乜影到相～
唯有喺食晏時整返幾幅美食照喇～
呢日嘅lunch係意大利餐～ 主打意粉～
喺我哋食晏地點對上一個短lift嘅位置，有一間小屋仔入面居面都有creep賣呀～
我哋滑雪都滑到要分開舖頭食晏同食甜品～ 犀利哩！
Yuki非常專心咁食緊佢手上果個chocolate creep～
下午繼續挑戰其他不同嘅雪道～ 雪依然落得好大～ 白曚曚！
滑到咁上下，又等下人～ 小朋友就爭取時間又玩下雪～
Yuki揸住兩支poles玩玩下變咗做表演拉大提琴喎～
一陣間又成頭都係雪～ 連個滑雪鏡上面都積到一堆雪～ 勁！
最後玩到時間唔多夠～ 雖然我哋係買咗兩邊共通券，但最後袛係可以匆匆由赤倉觀光打斜滑返過去赤倉溫泉就要走喇～
Yuki呢張相感覺好似好大個女咁喇～
返到酒店….又係喺門口玩雪！！
Mommy無佢哋咁好氣～ 過酒店隔離個creep檔幫襯下先～
宜家啲日圓平咗～ 食嘢都覺得抵咗～ 四五百円一個creep，即係港紙三十蚊左右～
一個creep三個人分～ 分甘同味～ 唔知Yuki會肯同Daddy Mommy一齊分嘢食到幾歲呢？
轉眼又到六點食晚飯時間喇～ （無錯，我啲係頭先食完甜品creep！）
今晚嘅鍋物有海鮮鍋～
呢餐飯終於都輪到Daddy坐Yuki隔離喇～
呢間酒店入門口旁邊有個lobby area～ 我哋每晚食完飯就會喺度坐下傾下計～
更重要喺成間酒店袛係得呢度有WIFI上網～
小朋友還小朋友喺一邊玩～ 大人有大人喺另一邊傾計～
坐到九點幾大家各自返房休息喇～
咁返到房梗係未瞓住喇～ 睇一陣電視，見有啲餓添～ 係喎，六點鐘咁早食晚飯～
喺房整返個宵夜食下喇～
今晚呢個麵就犀利喇～ 睇Yuki食得幾滋味～
我哋自製加料即食麵～ 喺便利店另外買咗厚燒肉子、同五花腩～ 豐富到呢！
食飽飽～ 零舍好瞓～ Zzz…
沒有留言:
發佈留言