等足成年嘅滑雪之旅又開始喇～
繼上年跟過Joyce姨姨佢哋玩呢啲滑雪團之後，今年欲罷不能～
更犀利嘅係… 我哋今年因為報名唔夠快，報唔到果間滑雪團～ 咁點算呢？大家又好想滑雪喎～
最後唯有我哋自己搞個自己友團喇～ Mommy負責搵機票、酒店、交通接送安排～
三個familes, 九個人～ 六大三細～ 日本我哋又嚟喇～
我哋搭平安夜朝早十點左右嘅飛機～ Yuki同平時返學咁上下鐘數起身～
去到機場食埋個翠華早餐啱啱上得機～
Yuki真係快高長大～ 宜家伸隻腳出嚟影相已經開始唔係太分到邊隻係Yuki邊隻係Mommy嘅腳喇～
用下面幅相開估喇～
另外宜家Daddy抱起Yuki，佢對腳已經長到Daddy膝頭哥喇～
班機到達東京成田機場約下午三點幾～
Daddy一心諗住去到機場先買兩張So-net Pre-paid SIM Card～ 點知去到個counter，一講話係Nano SIM，居然話無哂！ 估唔到宜家啲Nano SIM咁搶手～
大家如果諗住去日本先買的話要諗清楚呀！ 安全啲可以喺香港買其他牌子啲電話卡先出發～
買唔到電話卡唯有繼續今日第二部份嘅行程～ 就係坐包車去新潟嘅赤倉溫泉～
路程有超過二百幾公里～ 預計最少都要五六個鐘～
因為我哋有九個人，而每架車最多可以坐八個人～ 所以我哋同Ethan佢哋一架車～ Joyce姨姨佢哋另外一架車～
好似上年跟團果程車咁～ 由成田到離開東京市區塞咗足足兩個鐘！
之後中途每個鐘司機都會去啲休息站俾我哋去下厠所～
到八點左右搵個大啲嘅站停耐少少食埋晚飯～ 呢個叫上里SA～
嚟到呢啲SA就諗起以前揸車喺日本旅行其中一個最鍾意嘅就係去呢啲SA休息食下嘢～
第一餐Yuki揀咗個咖哩奄列飯～
Daddy Mommy就食個拈麵烏冬～
Yuki喺日本旅行食得最多係咩呢？
咪就係ソフトクリーム軟雪糕囉～
由於我哋包車呢間中央Taxi無license直接由機場去到新潟滑雪區～ 所以過咗長野我哋要換另一架車～ 就係咁樣要換車就出咗啲問題喇～
車我哋個司機姨姨去到轉車地點唔見另外果架車喎～ 結果擾讓一番，超過半個鐘後先去到另一個相約轉車地點～
連我哋住果間酒店都再三打俾Daddy問我哋到未～ 可能擔心我哋咁大雪會唔會蕩失路喇～
結果我哋終於喺夜晚十一點半去到酒店嘞～
由香港時間朝早七點幾出門口，到日本時間夜晚十一點幾先到酒店～ 足足用咗十七個鐘！
聽日開始一於要滑雪玩返夠本～
沒有留言:
發佈留言