2014妙高赤倉滑雪之旅 (12月29日)

本來一早約好咗包車公司話朝早9:10喺酒店接我哋～　

點知朝早七點鐘酒店老闆娘嚟敲門通知我哋，話包車公司打嚟話要早一個鐘嚟接我哋～　

好彩前一晚已經執好哂行李啫～　

即刻最快速度落去食埋早餐，準時八點十五分左右開車～　

老闆娘仲送到出門口，目送我哋架車走～

今日嘅天氣差咗好多呀～　太陽伯伯又唔見咗喇～　我哋之前果兩日真係好彩，有藍天、有太陽～

返東京呢程都係好似到果日咁，要中途換車架～　呢度仲係長野範圍，所以都仲落緊雪～

就係咁樣啲行李就由一架車逐件逐件搬過另一架車嘞～

另外好奇怪地，今次返東京呢程架車又可以俾我哋九個人坐哂喎～　不過就要有一個人坐司機位隔離囉～　　一架車仲好喇～　大家可以喺車傾計嘛～　　不過全程車基本上得三位小朋友一路玩，一路傾計無瞓過～　大人個個都瞓咗～

今次呢程好順利呀～　坐咗兩三個鐘就到距離東京剩返少於１００公里～　夠時間都搵個ＳＡ停低鬆一鬆喇～

Yuki’s favorite又嚟喇～

未到中午我哋就返到東京喇～　

因為架車唔可以去成田或羽田機場以外地方～　所以我哋選擇要佢喺羽田機場放低我哋～　

跟住我哋就同James佢哋say goodbye喇～　因為佢哋會住另一間酒店同會早我哋一日返香港～

咁我哋就同Ethan佢哋搭機場列車再轉ＪＲ到池袋～

兩位小朋友開始大個喇～　自己看管同拎自己嘅行李～

仲可以一路拎、一路行、一路傾計添～

呢兩晚我哋住呢喺間喺池袋北口嘅東橫ＩＮＮ～

由於未到Check-in時間～　未有房俾我哋，所以放低行李喺酒店我哋就出動食個晏先～

Mommy介紹池袋有間拉麵名店喎～　行到去真係見到一條隊噃～

呢間無敵家舖頭唔算大～　約有十零二十個位～　

就快到新年～　舖頭已貼出１月１日起休息三天～

全間舖都係呢啲吧枱位～

我哋叫咗豬骨叉燒麵同埋沾麵～

人多嚟如果肯分開坐就會快啲有得食～　

食埋嘢我哋又出去週圍搵Sim Card買喇～　先行返池袋站～

搵咗原本話有So-net嘅一個地址，但係間舖頭原來已經無咗～　

結果喺Bic Camera問到有隻叫BIC SIM嘅卡終於有Nano size賣～

連埋稅四千幾円～　有２ＧＢ，９０日有效～

之後再去行下街喇～　今次聽大家講東京御茶之水有條街，成條街都係賣滑雪用品～　

我哋之前一次都未嚟過呢個站㗎～

搵下撞下～　終於見到一列舖頭喇～

有啲成幢六七層都係同一間舖頭～　

童裝滑雪鞋五千幾円一對咋～

啲Ski又靚又colorful呀！

收銀處仲有好多糖賣添喎～

行咗成兩個幾鐘～　係時候要去食晚飯喇～

今晚我哋約咗個神秘嘉賓喺東京站食飯～

東京站大肆宣傳個站一百週年紀念～　

神秘嘉賓就係細舅父一家嘞～　佢哋啱啱又嚟咗日本玩～　咁啱就到時間可以一齊食餐飯～　真難得～

呢晚返酒店前，又去便利店入貨宵夜～　Yuki又搵到Frozen產品呀！　Frozen喺日本嘅產品都幾無孔不入喎～

唔….計劃下聽日Yuki可以去咩地方玩呢？