海洋公園－香港老大街

電視廣告的確好犀利～ Yuki三月幾嘅時候已經一直同Daddy Mommy講話海洋公園新主題－香港老大街開喇～ 由未去台灣旅行講到去完台灣返黎～

早兩個星期同Yuki終於去行咗海洋公園新開嘅香港老大街～

不過因為一路要追返啲台灣旅行遊記，所以遲遲都未寫返呢篇香港老大街～

今次成個香港老大街區域都算係幾用心去設計～ 真係搵返唔少老香港嘅元素～

入口處有㗎六十年代1A路線九龍巴士公司嘅巴士～

另一歷史文化遺產電話亭～ 宜家呢個年代，人手一個（或以上）智能電話，街上嘅電話亭已經買少見少～ 呢個有皇冠標誌嘅電話亭，連Daddy都未喺街上見過～

舊式舖頭嘅摺合式鐵閘，開舖閘舖時發出拍、拍、拍嘅聲響～ 地下要有條路軌，一係就突出地面，但出入舖頭時要跨過佢；一係就窟條坑藏落去，開舖時間就用塊板冚實佢～

Yuki仲觀察到一啲細微嘅嘢～ 大家覺得下面張相有乜特別呢？

就係啲中文字係由右至左㗎～ 以前中文字都係由右至左，唔知由幾時開始，橫向嘅中文字篇排漸漸變成由左至右～ 可能係電腦嘅關係？ 趁機同Yuki上吓中文堂～

舊時街上嘅垃圾箱～ 有啲左右兩邊仲會有個煙灰兜扣落去～

木箱裝玻璃樽汽水～ Yuki呢個樣有少少不耐煩喎～ 丁字腳加斜眼…

嚟到小食檔～ 又有嘢教Yuki喇～

街頭小食賣過百蚊？ 香滑腸粉一百一十蚊？ 碗仔翅一百一十八蚊？

年輕一輩可能真係未見過呢啲數字～ 呢啲叫做花碼～

以前呢啲花碼喺日常生活都幾常見～ 小販檔、小巴、街市都好常見～

古老量體重磅～ 以前通常會出現於戲院售票大堂～ 企上去後有個圓形轉盤會轉，等佢停低入錢，就會有張紙卡仔跌出嚟～ 通常張卡嘅另一邊仲會有啲運程添～ 好似fortune cookie咁呢～

電車！ 香港其中一種最古老交通工具～

呢架木框車窗嘅復古電車，宜家其實都有一架喺街行緊～ 編號：120 大家可以得閒留意一下～

兩個已消失於現實嘅建築物：天星碼頭鐘樓同皇后碼頭～ 像真度好高呀～

交通亭～ 全人手人工智能交通燈～ 以前交通警察其中一個主要職責就係企嚮呢啲交通亭指揮交通～ Yuki雖然未經歷過果個年代，但係做起黎都似模似樣喎～

呢幅牆上面果兩樣嘢相信宜家啲小朋友都未必知係乜嘢黎㗎嘞～

前面有一條條坑果塊叫洗衫板～ 未有洗衣機嘅年代，袛有用手洗衫～ 唔想咁辛苦就唯有買塊洗衫板囉～

另外中間果一紮一條條嘅叫做籐條～ 用嚟做乜呢？ 犀利囉！ 有無聽過乜嘢叫做籐條炆豬肉? 就係曳嘅時候俾大人打果陣用㗎囉~

連Daddy Mommy黎到香港老大街都搵返好多兒時回憶～ 好掛住呢啲英文練習簿呀～

圓形皇冠嘜郵筒～ 原來有咁高㗎喎～

最後有一排小販檔喺纜車站旁邊～ Yuki開檔賣瓜、賣梨～

「平啲啦，老闆！」

好嘢！賣哂可以收檔喇～

Fun Fun 生日派對

現今嘅小朋友真幸福～ 生日會除咗麥當勞之外，愈黎愈多其他花款～

今日Yuki出席咗一個學校同學嘅生日會～

我哋仲約埋Yuki好友－Hilary兩姊妹載埋佢哋一齊去～

生日派對地點係西寶城嘅Playtown～ 之前去玩過幾次，出席生日會都係第一次咋～

到會自助餐，自己揀自己鍾意食嘅嘢，食飽先有力玩吖嘛～

Hilary係第一次嚟呢度玩，Yuki帶住Hilary逐樣玩～

呢條大滑梯真係幾斜呀～ 快到個樣都影得矇查查～ 不過都仲睇得到佢哋玩到笑哂呢～

今次總共有成５０個小朋友出席，同班同學都應該有廿個以上，所以佢哋全部都玩得好開心呀～

直頭好似學校小息咁，聽到好多小朋友互相連名帶姓地叫住大家嘅名～ 哈哈！

呢條水管滑梯又係另一條好快嘅滑梯～ 滑咗落黎坐定定就影得清楚～ 不過無乜速度感喎～

咁搵張有速度感嘅先～ 呢張未落地前半秒嘅，係咪好有動感呢～

到切蛋糕時間喇～ 咁多小朋友圍埋去，好彩Daddy手長腳長，舉到高一高先影到裏面發生緊乜嘢事～

唱完生日歌，切完蛋糕，再影啲大合照～ 壽星女就係左三果位女孩子～

 

今日發覺到Yuki唔單只對鏡頭敏感，仲係對Daddy嘅鏡頭敏感添喎～

此話何解呢？

話說影大合照之時，小朋友愈聚愈多，成三十個小朋友～ 即係有成廿幾三十個大人個個舉住相機影緊呢班小朋友～

而Daddy無迫入去，所以袛喺後排舉高部相機影落去～ 即係話Yuki係見唔到Daddy個樣，唔知Daddy有無喺度影緊佢嘅～

但係Daddy從個LCD Mon隱約見到Yuki小朋友伸高個頭，舉高手做Ｖ準確向住Daddy嘅鏡頭喎～

再close-up近啲～ 嘩！識得側側身繼續做Ｖ字手俾Daddy～ 好叻呀！

然後仲要攝位企上去凳上面影添～

之後Yuki行返埋黎，Daddy問佢點解見唔到Daddy都知道影緊佢呢？

Yuki話：「一睇個相機套就認得喇！」

Daddy：『。。。』

台南、台東、台北趴趴走●第八天(4/7)

太快喇～ 咁就到咗今次旅程嘅最後一日喇～ 真係有啲唔捨得…

今朝嘅早餐又去另一間特色餐廳－－＜好,丘＞ 

＜好,丘＞位處１０１大樓隔鄰的一個舊村（四四南村，又稱眷村）～ 宜家已經改為公民會館，有啲舖頭，及餐廳～

由於係從舊村屋活化已成，所以仲保留咗多呢啲舊建築群～ 另一個特點就係影相時可以同時影到新舊交錯嘅建築～

隱約於樹蓬後嘅１０１大樓～

原來由呢度影１０１大樓嘅角度又幾好㗎喎～

原來唔止香港啲人鍾意影舊建築，台灣都好多人鍾意影㗎～ 好幾個位置要輪住嚟影添～

言歸正傳～ ＜好,丘＞出名食品係bagel～ 我哋叫咗一個煙鴨腔bagel，另外一個係煙肉蛋三文治～

坦白講，啲bagel比較硬，包住啲餡料食起嚟有啲困難～ 我哋一致覺得個煙肉蛋三文治更好食～

 

一路食，一路不停咁打一個電話～ 話說今日朝早開始daddy就不斷打一個電話～ 希望可以打得通訂位去一間餐廳食飯～ 可惜電話一直都無人接～ 唯有每隔幾分鐘又試打一次～

另一邊廂，繼續周圍睇下喇～

同餐廳分享同一屋簷下嘅另一啲小小精品店，賣啲手工製品，呢啲小店多數係店主一人，一路看舖，一路做佢哋自己嘅製品～

食完早餐再嚮呢度四圍行下～ 唔～ 真係有好多影相嘅好景！

紅磚牆～ 好有風味呀！ 香港宜家市區相信都好難搵到呢類紅磚牆建築呀～

Yuki真係好肯配合攝影師嘅小model呀～ 單人相嘅pose完全唔使daddy話要點樣擺～ daddy唯一要做嘅袛係叫Yuki企前啲、企後啲就得嘞～

宜家漸漸發覺原來我哋一家三口合照其實好少～ 尤其是旅行時又唔想帶腳架，又唔係次次有朋友同行可以拜托幫我哋影合照～ 第日都要再諗諗辦法～

離開公民會館，時間上有啲空檔～ 要做啲好重要嘅嘢！

就係買手信喇～ 由於之前一直都懶得帶住手信周圍去，所以留待今日最後一日先一次過買齊所有手信～

行經１０１大樓，影返張以前影開嘅角度～ 基本上好難連埋人一齊影～

Mommy知道窿路世貿三越地庫有好多間買手信舖頭～ one-stop shop嘅意思就係一次過買到哂要買嘅嘢，正好形容我哋～

電話最後都係無人聽～ 我哋唯有親身去睇下有無位喇～

乜嘢餐廳咁巴閉呢？ 咪就係＜Hello Kitty餐廳＞囉～

去到門口問下，無預訂午餐已經無位～ 最快要夜晚７點先有位～ ７點？我哋要去機場喇～ 就係咁，Yuki喺餐廳門外喊咗出黎～ 又難怪Yuki嘅～ 因為之前幾日已經講好咗去台北就會帶佢去Hello Kitty餐廳食嘢～

好彩～ Yuki唔係一個喊唔停嘅小朋友～ 喊左一兩分鐘就收聲喇～

仲肯喺門口同啲餐牌同飾櫃影相添～

Mommy見Yuki咁可憐又咁乖，應承買一個Hello Kitty蛋糕俾Yuki啦～ 睇下蛋糕櫃裏面有幾多Hello Kitty蛋糕～

登登登！即買，即開，即食～ 我哋喺餐廳門口就咁一人一啖幾分鐘就食哂個蛋糕喇～

午餐食唔到Hello Kitty餐廳，唯有另覓地方喇～ 隔幾條街原來就係度小月，又唔係好多人排隊喎～ 就喺呢度食喇～

眨下眼，度小月嘅擔仔麵已經食完嘞～ 跟住都係繼續食～

Mommy再出動左旅遊書，搵到一間coffee shop叫＜Piece of Cake＞有好好味嘅卷蛋～

我哋開頭淨係叫咗兩件（一件抹茶，一件朱古力）～ 食兩啖已經決定要再叫多一個～ 因為太好味喇～ 相信如果相機拎出黎慢啲嘅話，袛係會影到幾隻吉碟～

差唔多要返酒店拎行李出發去機場喇～

尋晚同奈奈姨姨食飯時多得佢幫我哋今日約左一架Benz的士載我哋去機場～

司機先生非常健談，開得又定又安全～ 好快就到桃園機場～

上一次離開台灣時，因為時間唔夠，令到Yuki無得去機場裏面嘅Hello Kitty候機室～

今次預咗足夠時間，可以俾Yuki盡情影、盡情玩喇～

左影影，右影影～

扮可愛地影～ 唔知可以扮可愛到幾多歲呢？

唔識畫Hello Kitty的話，睇咗呢幅圖，就可以六歩畫出一個Hello Kitty㗎啦～

唔知係咪Ｄ人已經玩厭哂呢個Hello Kitty候機室呢？ 我哋７點左右呢啲時間都好少人喎～ 鍾意影邊度都得～

成個候機室都無人，直頭好似包機咁～

連隔離嘅精品店門外果隻Hello Kitty都唔好放過～

返港航班開始登機～

今次嘅八日台南、台東、台北趴趴走終於圓滿結束！

再一次多謝Ellen姐姐、CPU阿姨一家、奈奈阿姨嘅招待～ 相信不久嘅將來，我哋會再一次去台灣玩～ 下次目標係花蓮！

多謝大家無比嘅耐性等我哋呢個不定期遊記發布～ 聽日開始又可以回復為大家報導返我哋返香港後嘅近況喇～