行程過左一半喇，第四日～ 喺綠海棧瞓醒天色比尋日好～ 有少少陽光～
晨早天氣有少少涼意～ Yuki都係著返件外套好啲～ 呢個風車可以話係綠海棧嘅標誌～ 揸車離遠就見到㗎喇～
綠海棧佔地廣闊～ 食早餐嘅地方位於戶外，放著悠揚嘅音樂，好放鬆～ 好舒服～ 加埋呢個咁美味嘅早餐，真想時間停頂～
臨離開綠海棧，當然要同咁靚嘅民宿一齊影多啲合照喇～
雖然袛係短短嘅一晚，但係Daddy Mommy同Yuki都過得好開心呀～
綠海棧～ 希望我哋以後有機會再見呀～
離開綠海棧，我哋繼續探尋墾丁另外幾個景點～
尋日揸車去綠海棧時已經有經過呢度－－船帆石～ 今日一定要停低睇清楚，影幾張相喇～
今日天氣有幾好呢？ 睇下我哋戴哂太陽眼鏡咪知囉～
呢塊船帆石除咗似船帆之外，亦有人話佢似前美國總統尼克遜嘅頭，好似佢個頭望向海出面咁呢～
然後再向南下一小段，有一個由貝殼變成砂而形成嘅砂島～ 雖然佢叫做島，但並唔係四面環海嘅島喎～ 其實係一個海灘嚟㗎～
不過今日已經唔可以落去個沙灘行喇～ 因為砂島已經被列為生態保護區～ 沙灘範圍不准進入～
袛可以離遠影相咋～ （咁又無指定要人抱嘅，不過Daddy同Yuki鍾意啫～）
咁咪唔知呢啲咁靚嘅沙係點㗎囉～ 唔緊要！沙灘旁邊其實有一個＜砂島貝殼砂展示館＞可供參觀～ 裏面就有少部份樣本放出嚟俾大家感覺一下～
咪睇Yuki下面摸緊啲沙好似都唔係好特別啫～ 離遠睇大家都以為無甚特別～ 咁我哋試下放大嚟睇睇喇～
嗱嗱嗱！ 見唔見到有亮晶晶嘅邊緣呀？ 因為呢啲就係由貝殼同珊瑚所經過好多好多年磨擦而成㗎喇～
展示館嘅外牆都好特別，好似由好多蠔殼而組成～
乜嘢叫做「螳螂補蟬，黃雀在後」呢？ Daddy影Yuki時，亦被影也～
墾丁最後一個景點～ 向台灣最南端進發～
鵝鑾鼻燈塔位於鵝鑾鼻公園內～ 進入公園後，先要經過一大片草地～ 香港無乜地方有咁大片嘅草地俾公眾享用～ 除左幾個哥爾夫球會入面先有咁大片咁靚嘅草地～
見到咁靚草地嘅我哋梗係開心到…飛起喇！
睇下邊個飛得高啲？
天氣咁好～ 我哋袛係影左十數分鐘，就覺得背脊膊頭有啲赤赤痛喇～
但係睇住呢兩母女在草地上開開心地說說笑，點捨得催佢哋走呢～
大家到學中文時間嘞～ 鵝鑾鼻原來仲有下面呢個寫法㗎播～ 兼且原來呢度係台灣八景之一嚟㗎～
行下行下，終於上到山頂見到燈塔喇～
好可惜呢個燈塔袛可遠觀，唔俾遊客上去㗎～
唔覺唔覺，宜家Daddy Mommy彎身同Yuki影相已經俾Yuki高過我哋喇～ 睇怕好快Daddy Mommy就唔使再彎身就Yuki㗎喇～
再見喇，台灣最南端～ 鵝鑾鼻燈塔～
呢日嘅午餐，可以算係最無準備嘅一餐～ 因為燈塔附近好似無乜特別嘢食～ 之前又無做research，又唔想揸返墾丁大街果邊，因為我哋之後嘅行程就要出發揸去台東㗎喇～ 咁可以去邊度食呢？ 呢個時候唯有靠GPS指引喇～ 我哋輸入週邊景點嘅食肆，就有呢間＜龍磐餐飲＞走出嚟嘞～
跟住GPS指示，經過門口… 有開舖，但係無人嘅？ 咁點呢？ 幫唔幫襯好呢？
但係附近都無乜其他食肆，唯有試下喇～
我哋點左一個套餐，因為啲餸名都唔多識～
呢個套餐都幾包羅萬有：有蝦、豬肉、鮮魷、炒蛋、菜、魚湯～
我哋食到一半仲有一個台灣導遊帶左一班（成十幾人嘅）香港人入黎食～ 佢哋應該係自遊行再搵當地導遊帶去周圍玩～ 咁當地導遊都會帶黎嘅應該都唔差喇～
食飽諗住直驅台東喇，點知又見到一個觀景點有好多旅遊巴停哂喺度喎～ 唔好執輸，落去睇下喇～
有個大平原，同埋有個好靚嘅海岸線～ 原來呢度叫＜龍磐公園／龍磐平原＞～ Lucky! 咁又俾我哋睇多一個景點～
出發到台東，先要揸上少少，經過恒春鎮～ 為食嘅我哋即時諗起恒春鎮有出名嘅小杜包子～
二話不說，輸入小杜包子個電話，GPS路線即時計算好～
幾個字後已經到左門口，泊好架車～ 點解好似無乜人咁嘅？
呢邊係恒南路入口，有好多職員整緊包，但係無乜人排隊～ 沿著指示行左一陣去左另一邊～
嘩～ 原來正門搬左過恒公路，好多人呀～ 我哋拎左飛要等成三十個號碼！ 一場黎到，點都等下喇～
終於到我哋～ 我哋要左個煙肉香腸、麻糬紅豆、大肉飽、芝士飽～
跟住真係開始連續三小時／超過130公里嘅車程～
沿途喺台９線（南迴公路）都落住都幾大嘅雨～ 迂迴嘅山路絕對唔會令人眼瞓～ 就係咁由台南嘅西岸跨過個山去到東岸～ 然後沿著海岸線繼續向北行，直到台東鹿野～
傍晚六點幾，鹿野＜鹿鳴溫泉酒店＞到着～
好好彩我哋有間頂樓嘅房～ 樓底好高～ 間酒店嘅房亦都好大～
房內有個私人風呂將附近溫泉嘅水引入房間～
鹿鳴溫泉係炭酸溫泉，所以無硫磺味～
Yuki! 唔好浸住先喇～ Daddy揸左三個鐘車，又攰又肚餓喇～
如果大家諗住會住呢間酒店就要留意，佢得一間餐廳，夜晚淨係得自助餐～ 我哋當然唔會食自助餐，既然有車，梗係週圍搵下嘢食喇～
頭先到酒店先我哋已經有經過一條街好似都有幾多嘢食～ 揸返出去大約十分鐘～
呢間就係我哋揀左嘅林記牛肉麵～ 好明顯係家庭式經營，街坊生意喇～
人唔多，但好地道～
我哋晚餐嘅滷肉飯、滷蛋、紅燒牛肉麵－半筋半肉、手包餃子～ 抵食！
臨返酒店～ Yuki與Daddy又要去7-11買啲嘢返酒店做飯後甜品～ 台東嘅7-11，門外有隻著左民族服飾嘅公仔呀～
經過今日長途拔涉，終於返到酒店可以盡情享受我哋嘅私人風呂喇～ 早抖！
沒有留言:
發佈留言