城堡過嘅一晚，大家都瞓得好甜～ 一覺瞓醒已經九點喇～
尋晚天色昏暗，個露天風呂睇得唔真～ 今朝起身即刻再嚟過多角度報導～
因為布拉諾城堡喺附近算係最高嘅一間屋，所以喺呢度浸浴都可以浸得好放心～
房內有一幅落地大玻璃，張床大到打橫打直瞓都得呀～
之前都話台灣民宿好open㗎喇～ 呢間又係將房間同洗手間靠一幅唔到頂嘅牆隔開咋～ 洗手間係Yuki最鍾意嘅粉紅色磚～
除咗頭先果邊有個露天風呂，另外呢一邊又有個露台可以俯瞰國道９號～
喺未落去食早餐之前嘅空檔，Yuki望住窗外嘅風景，然後聽住房內放住幾隻好好聽嘅外語CD（老闆連CD都有用心地揀選），跟住有個小朋友表演俾大家知乜嘢叫做聞歌起舞～
早餐於地下嘅客廳進食～ 因為前一晚已經先要求每間房嘅人將要食早餐嘅時間寫嚮塊黑板上面，所以大家可以喺唔同時段享受一個屬於自己嘅進餐環境～
早餐係由老闆娘親手即製嘅，有綠豆麥皮、公司三文治、果占香蕉多士～ 非常美味！ 一路食，一路同老闆娘傾計～ 原來佢哋一家三口幾個月前嚟香港玩過呀～
介紹＜布拉諾城堡＞必須講埋佢嘅外面～ 因為實在裏裏外外都咁用心呀！
建於國道９號上～ 樓高四層～
城堡前嘅一大片草地花園亦屬於民宿範圍～ 可以俾老闆同老闆娘盡情打造出佢哋理想嘅環境～
連DIY韆鞦都有呀～ 犀利哩!
房內有一本簿俾入住嘅客人隨意將大家對布拉諾嘅感受寫低～ 嘩！一睇之下真係覺得台灣朋友好犀利～ 不僅僅有好多用寫得好漂亮嘅文字，仲有好幾篇除咗文字仲加埋彩色插畫，好有心思呀～ 可以想像老闆佢哋讀每一篇留言俾佢哋時一定好感動～
Yuki代表我哋亦喺本留言冊留下兩幅台東圖畫～
布拉諾城堡係我哋今次全個台灣旅程最鍾意嘅一間民宿～ 因為呢度實在每一個細節都投射著老闆同老闆娘嘅心意，讓人過著舒服放鬆嘅時光～
真心希望如果再有機會去台東的話，一定要再嚟布拉諾城堡！
離開城堡後我哋先到＜台東森林公園＞，一陣會合CPU阿姨～
停車場旁邊有個幾大嘅遊樂場～ Yuki一路玩一路等虎虎喇～
Yuki俾個含蓄笑Daddy吖～ 攞起甫士好似大過咗幾年咁～
今日嚟森林公園其中一個目的喺踩單車～ 台灣原來有呢種雙人單車喎～ Yuki可以坐前面個座位，縮起雙腳，唔使踩～ 而又未致於細到好似ＢＢ果種座位～
租金二百台幣可以踩三個鐘頭～
我哋隨便無目的咁踩咗幾個字～ 中間見到有啲隧道，再踩遠啲有啲唔知係河定係人工湖～
大家覺得係唔係河呢？ 我哋見到有人無踩單車應該係由入口行到入黎㗎～
今日天氣都算暖暖哋，所以Yuki都要除咗外套～ 裏面果件唔係長袖T shirt，其實係UNIQLO嘅底衫嚟㗎～ 哈哈！
無幾耐CPU阿姨佢哋就到喇～
跟住又到食嘢時間囉～
Wii叔叔先帶我哋去＜榕樹下米苔目＞～ 米苔目其實係似米線嘅麵條～ 可惜我哋去到點幾鐘已經賣哂喇～ 袛係剩返米粉… 都好喇～
跟住再去食甜品～ ＜客來吃樂＞嘅綠豆算～ 食起嚟似綠豆糖水～
Wii叔叔之後又帶我哋去左一間coffee shop－－＜Cheela＞，間coffee shop後門好特別～ 有一條已經廢置嘅火車軌，近幾年經過活化而成～
當局將火車軌旁邊舖好哂木板～ 宜家變成居民晨運、散步、踩單車嘅好去處～
陪住我哋由台南嚟到台東架車終於要還喇，所以先麻煩Wii叔叔車Daddy去台東火車站還車先～ 然後順便車埋Daddy同啲行李去機場check-in咗先～ 咁一陣就唔使咁趕喇～
講開車，Daddy爭啲唔記得同大家分享一樣嘢～
今次台灣揸車係Daddy十幾年前揸過美國之後第一次再揸左軚車～ 出發前Daddy準備左一張貓紙提醒自己～ 如果去到路口無車可以跟的話就望一望張紙先出路口，咁做無咁易入錯線嘛～ 總結今次旅行揸車嘅經驗，台南台東揸車都幾享受㗎～
好嘞～ 返去Cheela繼續嘆咖啡與傾計～
台東實在係好地方～ 人口密度低，寧寧靜靜～ 淨係睇下我哋影嘅呢啲相～ 極目望去都無人㗎～
終於要同CPU阿姨、Wii叔叔同CPU媽媽講再見喇～
「謝謝你們這兩天陪我們到處玩、到處逛、到處吃！ 還要謝謝Wii爸、Wii媽還有虎虎呢！」
到達台東航空站～
呢個算係一個小小嘅機場～ 應該袛供內陸機使用～
臨上機前等Yuki同着住傳統民族服嘅原住民影幅合照喇～
話咁快唔使一個鐘就到達台北松山機場～
台北呢晚落幾大雨，機場的士站排隊超過半個鐘頭先上到車～
我哋住喺林森北路嘅＜福泰桔子商務旅館＞～
放低行李即刻出去搵嘢食，好肚餓喇～
酒店出黎隔一條街就有呢間鰻魚名店－－＜肥前屋＞～
好好彩地啱啱唔使等位就有得入喇～
喺呢度梗係要叫佢最出名嘅鰻魚丼喇～ 另外再叫咗一份天婦羅定食同蛋卷～ 唔叫太多嘢梗係有原因喇～
食飽先講！ Yuki可能都肚餓啦，食得好乖好快喎～
明明肚餓點解唔叫多啲嘢食呢？ 因為我哋今次喺台北得兩晚，而聽晚已經約好左同奈奈阿姨食大腕燒肉～ 所以Daddy話今晚要再去多一度地方食嘢～
跳上捷運，搭幾個站就到劍潭站嘞～
相信無乜邊個香港人會唔知捷運劍潭站即係去食乜嘢喇～ 正是新士林夜市！
Daddy話一定要搵返佢覺得最好味嘅蜜酥雞排！上次Daddy同Mommy嚟士林食蜜酥雞排已經係七八年前嘅事喇～
食哂要食嘅嘢～ 非常滿足地我哋搭返捷運返酒店休息喇～
沒有留言:
發佈留言