今日Yuki一早起身就不斷提我哋四月四號係咩節呢? 係呀，之唔係兒童節囉～
雖然唔及聖誕節咁開心有得收禮物，但Yuki都係以開心嘅心情迎接呢個兒童節～
從酒店房嘅露台望出去，終於都可以睇到個全景喇～ 鹿野呢邊算係台東嘅第二溫泉區，比較出名嘅係知本溫泉～
溫泉酒店有包埋我哋嘅自助早餐～ 快快食埋早餐就check-out離開～ 因為今日行程都算緊密呀～
離開咗酒店開車先到附近嘅<鹿野高台>～
呢度並唔係侏儸紀公園，隻恐龍係滑梯黎㗎～
唔好誤會鹿野高台係一個台呀～ 其實呢度係位於鹿野地區一個高原地帶，又有好多大草地，咁大地方可以有幾個用途～
第一樣活動已經要做足保護措施㗎～ 帶返個頭盔先喇～ 唔知有心定無意，點解頂頭盔又係粉紅色嘅呢？
開估喇～ 就係玩呢啲滑草兜車嘞～
由山坡頂滑落黎，都幾剌激㗎～ 咁啲兜車點樣拉返上山頂呢？ 唔使擔心，有個叔叔揸住架綿羊仔電單車拉啲車返上去㗎～
再去鹿野高台嘅另一邊更剌激呀～ 要揹住滑翔傘飛奔出呢個短斜坡，睇見都腳軟呀～
唓！ 又唔係要我哋玩～ 兼且宜家無得玩㗎，原來要夏天先有開放呢啲活動，另外夏天仲有熱氣球活動～
揸車離開鹿野高原，出發去下一個目的地會合我哋今次台東行程嘅地膽們嘞～
我哋約好喺初鹿牧場見面～
大家記得佢哋嗎？ 係CPU阿姨呀～ 上年十二月時＜會台友＞第一次見面於香港，果時我哋盡地主之誼～ 今次碰啱CPU阿姨佢哋要返Wii叔叔嘅老家台東過清明節，所以就麻煩佢哋做我哋台東部份行程嘅嚮導喇～
虎虎上次黎仲係坐BB車，未識行～ 今次已經可以自己行黎行去喇～
Yuki雖然袛係上次見過虎虎半日左右，但係今日見返虎虎一見已經好似好熟咁播，攬住虎虎周圍影相～ 可能因為Daddy Mommy經常都會俾Yuki睇CPU阿姨個blog，所以令Yuki覺得同虎虎好熟絡喇！ 哈哈～
同好朋友一齊嘅行程，最開心可以影多啲全家福～ 唔該哂CPU阿姨同Wii叔叔～
今次嘅台灣行系列到目前為止，已經有好幾位友好同Daddy或Mommy講過Yuki攞pose好叻呀～ 揀相做呢篇blog時真係不得不承認呢～
明明騎隻唔識郁嘅牛，居然做到個pose好似騎緊蠻牛咁喎～
嚟到牧場親親大自然，無理由淨係同啲唔郁嘅牛牛影相嘅～ 拎住啲草Yuki想做乜呢？ 牛牛！Yuki嚟喇～
第一下餵嘅時候，Yuki成紮咁餵，俾牛牛成紮草扯左去，嚇驚咗！
跟住再餵就點都唔肯行埋去餵喇～ 你哋睇下隻牛牛邊有咁張條脷去食呢條草呢～
算喇～ 唔好迫Yuki! 俾佢挑戰第二樣嘢喇～
曾經唔記得幾耐之前去過一個有馬仔騎嘅旅遊點，當時Yuki並唔敢騎～
事隔數年，宜家五歲幾係姐姐嚟㗎喇～ 再挑戰！ Yeah!
牧場內有個DIY見學～ Yuki好想玩，Mommy又想同CPU阿姨佢哋去間餐廳飲咖啡傾計喎～ 咁點算呢？
「Daddy陪我！」
OK! 珍惜親子時間嘛～ Yuki手繪牛牛製作中…
十零二十分鐘就完成喇～ 跟住個哥哥即刻用風筒吹兩吹就乾埋～
今次除咗見到CPU阿姨、Wii叔叔、虎虎之外，仲見到虎虎嘅婆婆添喎～ 婆婆好後生呀！
然後再由Wii叔叔帶路喺台東周圍逛下～ 以下乃有名嘅＜綠色隧道＞～ 係一段長達兩公里道路，兩邊種滿樹木將條路變成一條隧道～
為食團隊又出動喇～ Wii叔叔帶路嚟到另一名店＜陳記麻糬＞～
門口有張枱，買完即刻坐底慢慢嘆，老闆仲沖咗壼茶俾我哋飲添～
晚餐就豐富囉～ 有Wii爸做東！ 請我哋食台東嘅海鮮名店＜美娥＞～
實在又豐富又美味到呢….記得影相時已經食咗大半啦～
多謝Wii爸、Wii媽盛情嘅招待～ 佢哋好似比上次嚟香港時又後生咗喎！
又不無道理嘅，台東好山好水，喺度生活，人都後生幾年喇～
說過再見之後，我哋就趕快往今晚住嘅城堡check-in啦～ 我哋無打錯字呀！ 真係城堡呀！
今晚我哋住嘅係台東嘅＜布拉諾城堡＞～
呢個民宿好溫暖，好有心思！ 每一磚一瓦，每一樣擺設，都散發住老闆同老闆娘對呢個城堡嘅投入～
每一梯、每一級都係影相取材嘅好地方～
好辛苦～ 好辛苦～ 揀咗好耐都無辦法取捨放下面呢兩幅相放邊張响呢篇blog度～ 結果… 兩張放哂囉～
一張有Yuki得意嘅表情～
另外呢張輕倚Mommy笑笑，好溫馨呀～
我哋住城堡最高間房－麗亞，間房特別在有個露天嘅大浴缸响呢個高私穩嘅露台度～ 好正㗎！
浸浴時間後，又係休息嘅時間喇～ 聽日就係台東行程嘅最後一日喇～
時間可以唔好過得咁快嘛？
沒有留言:
發佈留言