台南、台東、台北趴趴走 • 抵達篇 （3/31)

終於等到呢個八天復活假期之旅喇！

我哋既目的地係邊呢？ 好多人聽到後都話：「呢度都去到咁多日？」

八日差唔多架喇~ 皆因我哋宜家一係唔去旅行，一去就要黎啲深度旅行嘛~

好嘞！ 先介紹下我地今次既行程先喇~

呢次既台灣之旅，我哋嘅重點係台南、墾丁、台東。 但係由於無機位直飛高雄，所以唯有取道台北進出喇~

整個行程會台南（1晚）＞ 墾丁（2晚）＞ 台東（2晚）＞ 台北（2晚）

出發日早上~ 好耐未試過搭咁早（0725）嘅機喇！ 天都未光零晨四點幾起身，五點出門口！ 好彩係去玩，所以Yuki都非常合作，乖乖起身！

由於咁早，機場快線都未開，所以唯有一程過搭的士入機場。

 

一切順利，準時起飛，準時降落！ 九點我哋已經身在台北喇~

會到台灣旅行嘅朋友要注意喇！ 宜家有啲以日計既無限數據計劃，非常適合香港一眾機不離手一族！ 當然仲有好多場合都好有用喇~ 例如Daddy Mommy要分開行睇嘢，有WhatsApp就可以隨時聯絡；又或者搵路時，開個Google map就去邊都唔使驚喇！

平均一日都係港紙$20左右咋！

我哋幫襯台灣大哥大，其實喺機場幾間都有counter。不過我哋到台北嘅時候太早，入境果層嘅counter未開，要去返離境果層嘅counter。

<台灣大哥大：無限上網計劃>

搞掂電話卡，係時候向台南出發喇！

我哋由桃園機場搭巴士去高鐵桃園站，然後搭高鐵直駒台南～

原來高鐵宜家好多人搭架，下一班已經無位，我哋袛可以搭再後一班(10:57)喇～

唔駛個半鐘既車程，見到令人心境舒暢既開闊風景～

 

原來上次到訪台灣搭高鐵已經係兩年幾前，果陣Yuki袛係三歲幾～

中午十二點幾，台南到著！