剩低兩日一夜嘅台北行程，無密麻麻嘅行程，繼續我哋隨意式玩法～
福泰桔子雖然有包早餐，但係袛係一般多士果占果類，我哋決定出去搵嘢食～
Mommy隨手搵下閃閃令旅遊書有乜好介紹～ OK! 目標鎖定，出發搭的士去喇～
去到門口落的士已經見到人龍，一定唔會去錯喇～
呢間叫做＜ＢＵＳ蛋餅坊＞～
想食就要神心啲呀～ 因為每朝開五個鐘咋（６ＡＭ－１１ＡＭ），遲咗閘左門就無得食～
買外賣就排門口果條人龍，堂食就等到有位可以坐低落單～
門口可以睇到個姨姨好純熟咁煎啲蛋餅～ 愈睇愈肚餓添～
我哋叫咗三份：原味、煙肉同肉鬆加芝士～ 三份都好味！如果真係要選第一好味就揀Yuki選嘅肉鬆加芝士喇～
Yuki! 唔好食哂呀～ 留返啲俾Daddy Mommy呀，唔該～
食到一半見到外面落雨呀～ 兼且越落越大～ 我哋袛好搭的士去下一個目的地喇－京華城～
京華城對於香港嚟嘅家庭基本上袛係一個目的嘅啫，就係去＜BabyBoss＞嘞～
上次Yuki三歲幾時已經嚟過，不過當年仲細，無乜玩到幾樣嘢，做護士照顧ＢＢ直頭喊返出嚟添～
今次嚟已經大個好多喇～
先打工做空姐飛返一轉先喇～ 嘩，非常認真，除咗要換好制服，仲要拖埋行李喼添㗎～
Mommy有份上飛機俾小空姐Yuki服侍～ 但飛機內嚴禁影相，所以Daddy袛知道Yuki有派雜誌俾Mommy睇囉～
（唔知Yuki嘅筆友Ah-yo姐姐覺得呢個小空姐似唔似呢？）
下一項到去醫院學習照顧BB喇～ 呢～ 兩年幾前Yuki就係玩呢樣嘅時候喊囉～
當年Yuki係最細嘅一個，宜家算係中間左右喇，比佢大嘅哥哥姐姐都有～
但係明顯哋淡定好多喇～ 一嚟大個左喇，二嚟經過蘇浙兩年嘅洗練，喺呢個講普通話嘅環境完全無問題喇～
整個育嬰過程要換片、開奶、餵奶、掃風、洗肚臍～ 最後將BB放返床就可以收工嘞～
辛苦哂咁多位小護士～
第三份工係做時裝設計師～
其實又唔係真係設計時裝，今日Yuki返呢個時段係要幫模特兒化粧～
化好喇～ 俾Daddy Mommy睇下個粧化成點呢？
最後一份工啦～ 係做Yuki最鍾意嘅雪糕售賣員～
好講衛生㗎～ 要戴哂頭罩同口罩～ 仲要全部一齊用酒精洗手～ Yuki坐個位對正啲雪糕筒呀！
每個小朋友會派俾佢Daddy或Mommy三十蚊用嚟買雪糕食㗎～
呢杯就係Yuki賣俾我嘅雪糕喇～ 唔該Yuki～
放咗工自己都食返啖先喇～
臨走前將今次打工所賺嘅錢存入銀行～ 仲有張提款咭俾返小朋友㗎～ Yuki查下戶口宜家有幾錢？
離開BabyBoss～ 我哋閒逛咗一陣就去tea一tea先～ 揀咗呢一間近來都開始出名嘅夾餅店＜鬆餅。班＞～
舖頭唔喺大街，好有氣分嘅小店～
好彩有奈奈阿姨預先幫我哋訂定咗先，如果唔係可能無得食㗎喇～
夾餅好好食～ 咖啡又好好飲～ 所以我哋一食就…
食哂五個先停到手呀～
今日終於可見到今次台灣行於台北接待我哋嘅代表奈奈阿姨嘞～
Mommy今晚約咗奈奈阿姨去上次佢哋一齊食過嘅＜大腕燒肉＞～
呢間燒肉店採用全bar枱設計，職員會喺我哋面前逐樣嘢燒～
啲燒肉好好食～ 牛嘅不同部位有唔同嘅美味～
重溫住呢啲相都令人吞口水呀～
下面呢一塊睇落好似無乜特別～ 但食落口就知不得了！ 佢落咗少少wasabi，原本仲諗住會搶哂牛肉嘅味道啦？點知出奇啲牛肉嘅鮮味同肉汁都好似俾佢帶出～ 好神奇呀！
呢次嘅台北行程有奈奈阿姨陪我度過呢個開心愉快嘅晚上實在好開心呀！
最後搭捷運返酒店～ 仲爭一條街返到酒店都失守！ 見到對面馬路有春水堂，Yuki好鍾意嘅珍珠奶茶元祖店～
台灣行嘅最後一晚，Daddy Mommy要執行李喇，Yuki就可以大覺瞓～
沒有留言:
發佈留言