台南、台東、台北趴趴走●第二天(4/1)

尋日唔記得check-in時影低間酒店俾大家睇睇～ 今日補返先～

呢度係酒店既後門，面向台南運河既一邊～ 如果揸車既朋友可以泊呢邊既車位～

雖然酒店細細，但係居然有按摩淋浴設備㗎～ 同埋真係夠哂新淨同乾淨囉～ 呢間民生館2008年開幕，袛係四年咋～

酒店正門呢邊放住一排單車俾住客免費借用～ 唔知呢樣係唔係台南先有嘅呢? 不過啲單車清一色得大人既size～ Yuki袛可以扮下嘢咁騎下喇～

呢間酒店嘅營運模式其實真係幾似日本既東橫Inn果類～ 地下lobby旁邊有幾部電腦任你用上網又好印嘢又好～ lobby另一邊餐廳朝早包埋輕便自助早餐～ 又有間洗衣房俾大家洗衫～ 每次出入lobby都會同你打招呼鞠躬～

下次去台南或台東可以再考慮～ 台北暫時未有分店～

開始今日嘅行程～ 出發到台南另一主要景點區－－安平～

安平由1867年已經由英國商人開設幾間洋行於呢個港口～

比較特別嘅係下面呢間德記洋行～ 亦即係樹屋～

現址為臺灣開拓史料蠟像館～ 入場參觀要俾錢，大人NT$50～ 小學生以下免費～

＜安平樹屋＞其實係德記洋行以前嘅倉庫～ 開頭我哋仲以為係講樹上面起間屋果種樹屋添～

行到入黎真係嘆為觀止～ 成間倉庫被榕樹所包圍住咁生長～

台灣更以「樹以牆為幹、屋以葉為瓦」嚟形容呢間樹屋～ 實在絕不為過呀～

之後我地再行過幾條街到＜安平古堡＞～

呢個安平古堡嘅歷史追溯至更遠嘅1624年～ 原來果個年代，台灣曾經被荷蘭人所佔領～ 不過不足四十年就被中國人鄭成功攻下～

所以喺呢度亦有個鄭成功像，紀念佢喺台灣歷史上既事跡～

參觀完呢幾個安平歷史古跡已經接近中午嘞～

Ellen姐姐再帶我哋繼續台南趴趴走、趴趴食～

先食最就腳就喺安平古堡外嘅檔口已有我哋想食既蝦捲～ 順便仲有炸雲吞（餛飩）同棺材板～

呢個棺材板比較唔同嘅係用薄少少既方包，同埋裏面係咸既～

行過隔離就係有「台灣第一街」之稱既＜安平老街＞～ 呢條街據講係荷蘭人三百年前已經建成～

喺一間廟前有一樣好得意嘅嘢玩喎～ 叫做煮椪糖～

呢啲香港無得玩嘅梗係要玩下喇～

先將一個湯勺放嚮炭上面一路搞啲糖水加熱～

要不斷搞、不斷搞～ 搞左一兩分鐘開始滾喇～

跟住離火繼續搞～ 然後落發粉～ 再搞搞搞、搞搞搞～ 搞到好攰喇～

最後倒落隻杯度佢就會愈發愈高咁～ 都係唔多識用文字形容喇～ 去睇片喇～

玩完民間玩意，再繼續搵下地道台南小食喇～

安平既豆花都好出名～ 一般旅遊書會介紹同記豆花～ 但係有Ellen姐姐喺度梗係唔會淨係食旅遊書介紹嘅地方喇～ 係同記豆花過幾間舖就有另外呢間＜茂記安平黑豆花＞～

除左平時用黃豆做嘅豆花，呢度仲有一啲用黑豆嚟做嘅豆花～ 又為食又貪心嘅我哋就要哂兩款：紅豆白豆花同珍珠黑豆花～ 大大碗都袛係３０同３５台幣咋～ 好抵食呀～

離開安平區，我哋坐的士去中西區繼續食過～ 中西區算係比較local嘅地區，無乜遊客搵到黎呢邊㗎～

首先介紹呢間＜阿川紅燒土魠魚羹＞專賣一種用炸土魠魚塊既羹～ （搵唔到呢種魚香港點叫呀）

可以選擇配麵或者米粉～ 啲魚肉好新鮮，不過Daddy食落都係覺得有少少腥味～ Daddy都係要食魚柳飽先會話唔腥㗎咋～

跟住… 呢間＜醇涎坊鍋燒意麵＞係用鍋煮一種叫意麵嘅嘢～

全部都係即叫即煮，保證熱辣辣～ Yuki好乖咁幫我哋派好哂筷子等食呀～

個麵其實有少少日式既味道～ 有一片日式魚蛋，一段炸蝦天婦羅～ 另有一塊炸魚，一塊索滿湯既小麵飽塊～

我地一碗要意麵、一碗要烏冬～ 另外中間果盒係台灣肉圓～ 唔係呢間舖頭嘅出品，不過Ellen姐姐知道Daddy鍾意食肉圓，所以剛剛經過一間佢哋食開既肉圓舖頭＜杜家蝦仁肉圓＞買外帶黎呢邊一齊食囉～

相比之下，都係隻意麵好味啲～ 佢似係有啲炸過嘅感覺，所以可以索到多啲湯，食落嘅感覺亦都比較煙韌（ＱＱ的）～

終於食完～ （真係食完？）

同Ellen姐姐呢兩日嘅台南行程亦告一段落～ 好多謝Ellen姐姐帶俾我哋咁豐富又難忘嘅台南之旅呀～

 

係時候要準備南下去墾丁喇～ 跟住落黎嘅五日行程我哋租咗架車帶我哋去遊墾丁同台東～ 我地揀咗＜格上租車＞，佢哋都可以台南取車台東還車，袛要俾多二千台幣手續費～

我哋選擇喺台南車站旁邊嘅分店攞車～

攞咗車都黎唔切影下架車就即刻驅車南下墾丁～ 因為想盡量天黑前落到墾丁～

但係行左無耐經過落台南唯一嘅仁德服務區，自駕遊點都要見識下每個國家既service area有乜嘢吸引之處喇～

呢個服務區真係幾大㗎，有好多旅遊巴士俾啲團友落黎鬆一鬆～ 有7-ELEVEN～

Starbucks~ 手信店～ 買咗罐咖啡就繼續行程喇～

經過約三個鐘車程，終於到達墾丁喇～ 可惜都係天黑哂先到呀～

第一晚墾丁我哋揀咗呢間叫＜水岸＞嘅民宿～ 佢就喺墾丁大街後面平排嘅大灣路～ 行出墾丁大街唔使五分鐘～ 旺中帶靜！

之前上網已經好鍾意呢間民宿嘅呢間房～ 有個超大嘅浴缸可以嚟個家旅風呂呀～

墾丁嘅民宿有一樣幾得意嘅特色～ 就係好開放式嘅設計～ 廳，牀，浴室全部合為一！

Yuki高興到著住衫就想入去浸浴嗱?

揸左三個鐘車，都肚餓喇～ 向墾丁大街進發食個夠～

都話五分鐘出到墾丁大街喇～ 嘩～ 好多人好旺呀！

呢度又要跟下旅遊書嘅指引搵啲口碑好嘅檔口嚟食喇～

先嚟到呢檔炸鮮奶～

作為starter啱啱好～

行多兩歩見到呢檔好多人排隊喎～ ＜墾丁脆皮湯包＞

個個都係叫呢款脆皮湯包，其實即係煎小籠包～ 下面各種口味係俾你選擇加邊種味嘅調味粉～

都唔使等太耐，佢煎一底就可以好多隻～ 我地要左一盒八隻海苔口味～

嘩～ 有爆漿，有脆皮，有海苔味～ 我哋三個食完一盒有啲意猶未盡添～ 但係又唔想再排一次隊～ 唯有食其他嘢先喇～ 有機會的話聽日再食過囉～

遠處見到另一間好多人聚隻排隊嘅舖頭～ 近睇下，原來係主打賣醬烤雞扒嘅＜扛棒＞～

呢間就要等耐啲喇～ 差不多等成三十張飛～

我地唔食辣，要左個扛棒蜜汁醬～ 如果食得辣嘅朋友可以試下佢啲辣嘅口味～

食咗炸嘢要飲啲冰凍飲品降下溫先～

大家仲記唔記得Yuki好鍾意飲台灣嘅珍珠奶茶呢?

呢間＜50嵐＞係一間連鎖經營店，但係口碑都好好～ 墾丁大街佢最多人排隊買飲品㗎～

Daddy公司同事「大哥」介紹過話墾丁大街嘅滷味都好出名～

見人龍排隊做指標無乜走雞～ 入左間叫做＜一品滷味＞

喺門口自助式揀好要幾多款式同份量，俾完錢就可以坐入店內等佢整好送入嚟～

睇下牆上介紹此店嘅歷史，原來都已經有廿年歷史喇～

煮好喇～ 我哋揀左大腸、鵝翼、滷蛋、蘿蔔、鴨胗～ 見到其他枱好多人都會加埋個麵一齊食添㗎～

好飽～ 好飽喇～ 繼續漫步墾丁大街幫助消化一下～

Yuki因為今日表現良好～ 獲得獎勵可以玩街頭彈珠機～

Yuki玩得好專注～ 睇下佢嘅姿勢同神情，如果做功課有一半咁專注就好嘞～ 哈哈！

一家人出外旅行，心情放輕鬆～ 最開心莫過於隨意走、隨處食、隨時玩～ 每一刻都係開心時光！