台南、台東、台北趴趴走●第三天(4/2)

尋晚浸過大大個嘅按摩浴缸，瞓得零舍淋呢～

我地住嘅水岸民宿包埋早餐～ 但係原來唔係佢地自己造嘅早餐，而係俾兩張早餐券我哋過隔離間＜魔法廚房＞換領三文治一份加飲品一杯～  呢份豬扒蛋三文治都幾好味㗎～

早餐食完，check-out水岸民宿～

尋日一口氣租咗車就衝落墾丁，未有機會俾大家睇睇我地租左乜嘢車～ 今日出發前記得補返幅相俾大家先～

呢架係日產叫LIVINA嘅型號～ 1600cc 五座位五門揭背，不過係直尾，唔係斜尾～ 我地租五日，平均日租五百港紙左右～ 算幾抵喇～

點解要揀直尾呢? 好處係兩個大喼都放得落，以前試過租斜尾五門揭背，放左兩個大喼幾乎閘唔到尾門，又睇唔到倒後鏡～不過香港無呢隻款～ 唔知遲下會唔會引入呢?

今日墾丁行程第一站～ 向北走到海生館（全名係：國立海洋生物博物館）

 

到嘅時候十一點幾，未係好多人啫～

門票一般喺墾丁嘅民宿買會平啲～ 拎張換領券嚟到入場處換張正式門票就入得㗎喇～

尋晚Yuki打返香港時得嫲嫲喺屋企，爺爺出咗街，宜家打返個電話俾爺爺先喇～ 講個電話都要走來走去，左挨右挨～

 

一入門口就有個小水池俾小朋友（同大朋友或者媽咪）落去嬉水～

亦喺呢度影完呢幾張相之後… Daddy唔見咗個相機鏡頭蓋呀～ 用左好耐時間都搵唔返，又無其他人行過，唉～

海生館裏面分為三個展館～ 世界水域館裏面嘅古代水域有記載住由前寒武紀至現代嘅歷史～

巨大海藻林有個好大嘅水缸～ 大家有無留意到Yuki先?

世界水域另一角有呢個極地水域～ 裏面有仿北極嘅企鵝水箱展館～ 有好多企鵝呀～

遲啲香港嘅海洋公園都會有企鵝～ 不過好似得幾隻，同墾丁呢度有成一百幾十隻比都爭好遠～

午飯時間就喺其中一間餐廳隨便食一食喇～ Yuki就趁呢個時候寫明信片俾香港嘅親戚朋友～

食過無乜特別嘅午餐（所以無影度）準備去其他展館～

途中發現海生館有一樣比海洋公園更貼心嘅安排～ 就係可以免費為你影相做一個鎖匙扣～

當然喇，排得隊影，個影相姐姐會順便幫我地影多好多張～ Yuki非常配合，姐姐叫佢不停轉甫士都做得到喎～ 影完即刻出去揀相～ 鎖匙扣係左面果個～ 我地見都影得唔錯，另外再補錢加多一個磁石貼（右面）～ 揀完相要一個鐘頭後先有得攞～

接著就到左珊瑚王國館～ 呢度有啲似海洋公園～ 有海底隧道～

 

海底下有好多熟悉嘅海洋生物，好似鯊魚、魔鬼魚～

哎呀～ Yuki就黎俾隻殺人鯨食呀～

臨走之前再去另一個更大嘅嬉水區，有幾條實物原大嘅鯨鯊，啲水好有心思咁整喺啲魚身上灑落黎～ 令到啲鯨鯊更像真～

相信如果天色好啲仲吸引呀～

我哋無帶泳衣嚟俾Yuki～ 不過Mommy為左令Yuki可以玩得盡興，批准Yuki盡情落水玩，玩濕哂都唔緊要呀～ 走嘅時候上車換過套衫就得喇～

Yuki被魚食開有癮～ 居然又要送羊入虎口，俾呢條抹香鯨食呀～

為大家送上Yuki享受玩水嘅片段～

 

玩完左海生館，我地都要去今晚住嘅民宿check-in喇～

今晚住嘅民宿叫＜綠海棧＞～ 又係另一特色民宿～

呢個民宿離開墾丁大街有一段路程～ 位於一個山丘之上，有啲似美瑛果啲丘陵地帶～

地中海式嘅外表，每個顏色都係一間房～ 我地揀左綠色～

尋日都講過啲民宿開放式設計㗎喇～ 睇下呢個咁顏色鮮艷嘅房又係隔個布簾就係洗手間喇～

用細細粒七彩紙皮石嘅衛浴間，有我地最愛嘅家族風呂浴缸～

第二晚喺墾丁，仲有乜嘢未食過，或者有乜嘢要番叮再食多一次呢?

因為我哋個肚容量有限，第一晚可以食嘅嘢都有限～

今晚要食返啲燒烤食品～

先幫襯叔叔一隻燒魷魚～ 唔同大細價錢唔同～

燒好後仲幫你剪好哂，用支簽拮拮下就食得，好方便呀～

食過新嘢之後，當然有啲要再次捧場嘅食物喇～

認唔認得係乜嘢先? 嘻嘻～ 今晚係芝士味嘅脆皮湯包呀～ 三個人以近似搶食嘅速度秒殺咗八隻湯包喇～

唔～ 下面呢間係咪應該譯做＜青蛙奶奶＞呢？

類似珍珠奶茶嘅做法，最唔同係以墾丁嘅林鳳營鮮奶代替奶茶～

咁小朋友就更加啱飲喇～

繼續燒燒燒～ 燒帶子～

呢種係比較細嘅帶子～ 燒起黎都係唔及北海道果啲炭燒大帶子咁正～ 啖啖肉，又多汁～

又黎番叮系列喇～ 今日幫襯另一間都係咁多人嘅滷味店－＜吳師傅魯味＞

尋日見人食麵食得咁過癮，今日我哋都可以加個麵落去一齊食喇～

諗住，呢間係吳師傅魯味～

飲完一杯青蛙奶奶都未夠，再排隊買50嵐嘅珍珠奶茶～

呀～ 今次台灣旅行Yuki學識一樣嘢～ 就係清脆利落咁插支飲筒落個杯度～

燒烤美食最後一樣：燒粟米

非常之自動化嘅裝備，唔使自己用手去轉～ 插住喺度自己就會轉住黎燒～

等叔叔燒粟米之際，Yuki寓排隊於娛樂～ 頭頂50嵐嘅奶茶～

幾分鐘後，伯伯差唔多燒好喇～ 第一次燒粟米可以有咁多種汁選擇咋～ 不過我哋實在太飽喇～ 外賣返民宿先食喇～

呢晚係喺墾丁嘅最後一晚喇～ 好可惜天氣唔好，雲好厚，無辦法觀星呀～ 如果唔係啲雲，喺呢啲無光害嘅地方，睇星星一定超正～