台南、台東、台北趴趴走●第一天(3/31)

抵達台南高鐵站後，即時搭的士去酒店。不過因為未到check-in嘅時間，所以唯有放低行李先喇~

台南住宿我哋搵咗一間集團式嘅business hotel-康橋商旅（民生館）~ 呢類酒店雖然一般比較細，但勝在比較新，兼且網絡連線齊全。

講下講下都到午飯時間，我哋先同台南嘅Ellen姐姐碰面~

其實我哋呢次台灣之旅好榮幸得到Mommy分別喺台南（Ellen姐姐）、台東（CPU阿姨+Wii叔叔+虎虎）、台北（奈奈阿姨）嘅朋友招呼接待，好溫暖啊！

第一餐，度小月尋根~ 宜家非常有名嘅度小月，源於台南。我哋坐喺店外嘅枱仔，好有風味呀！

每一間度小月都有呢個標準既設定～ 入門口位就係淥麵既地方～ 台北果間都係咁架～

擔仔麵、擔仔米粉、鹵蛋、香腸、皮蛋、彈珠汽水～

<度小月台南本舖老店>

醫飽個肚就要周圍行下消化下先！

台南保育舊建築物做得好好～ 市內仲有好多日治時期既建築仲保留係度～

Yuki身後既就係過百年歷史既－原台南公會堂（建於1910年），宜家變成吳園藝文館～

另外呢座係原台南州廳（建於1912年），宜家變成國立台灣文學館，係國定古蹟黎架～

自從上次Ellen姐姐黎香港之後，已經希望搵個機會可以去台灣探下佢～ 今次終於有機會再見喇～

呢座外牆有大大隻寫住119既建築物係乜野黎既呢? 119係台灣代表消防熱線～ 呢座係原台南合同廳舍（建於1930年），宜家變成台南市消防大隊第二分隊～

咁下面呢座又係乜野建築物呀? 呢座係原台南警察署（建於1931年），宜家都仲係警察署～

行下行下，我地去左Ellen姐姐特登要介紹俾Mommy既咖啡店～ 店舖係Ｄ小巷內，相信如果唔係有人帶住，一定唔會知道有間咁特別既cafe～

<寮國咖啡> 台南市中西區中山路79巷60號

 

咖啡香濃好味～ 價錢袛係星巴克不到一半！

我地飲咖啡，yuki飲朱古力～ 一樣飲得開心～

係對面都有另一間個性小店～ 亦係cafe～ 架單車唔知係用黎裝飾定真係踩得既呢?

台南市有好多唔同既地方俾大家好悠閒咁坐下，睇下書，傾下計～

 

同繁忙既台北或者香港比較，真係另一種令人完全放鬆既感覺～

帶住杯未飲完既朱古力，Yuki隨意街頭一站都有少少悠閒風呢～

呢張相已經係facebook同大家見過面～ 我地都好鍾意呀～ Yuki隨手將地上既小石春拎起放上小羊咩既頭上～ 哈哈～

食食食、飲飲飲～ 跟住又到Ellen姐姐好介紹喇～ 台灣水果靚又甜，本來想去呢間名店－莉莉水果店，不過人太多喇～ 唔緊要！有地膽Ellen姐姐～

我地移師去隔幾條街既另一水果店－清吉～ 鮮切水果，果汁，沙冰都有～ 我地食左好好好味既蓮霧、哈蜜瓜、薑汁番茄、士多啤梨～ （好食到唔記得影相呀！）

行左大半奏，我地先行返酒店稍事休息～ Ellen姐姐今晚會叫埋佢男朋友Henry哥哥同我地一切食晚飯同去夜市呀～

鏡頭一轉我地已經食完晚飯既牛肉火鍋喇～ 事後驚覺原來一張相都無影到呀～:(

食過晚飯，我地再去台南最大既夜市～

＜花園夜市＞ 台南市北區和緯路與海安路交叉口

呢度既夜市並唔係每晚都開架～ 花園夜市每逢週四、六、日夜晚先開～

台版雞蛋仔：立體造型雞蛋糕～ 有槍，電單車，豬，雞～

呢Ｄ夜市最開心就係一路食，一路買，一路食，再一路買～ 睇下Yuki一邊大啖食地瓜球，一邊睇靚靚頭飾～

臨走食多個長長軟雪糕～ 好飽哦～

好可惜我地原來成晚都唔記得同Ellen姐姐同Henry哥哥合照呀～ 希望下次有機會可以見到Henry哥哥的話再合照喇～

就係咁，我地既第一天旅程告一段路～ 要返酒店休息喇～