今日又有「魔力都會」嘅活動喇～
繼上次啟動禮之後，今次係第一次會員活動～
活動係適合小朋友同家長親子嘅「小小廚師」歡樂派對～
地點係好就腳嘅銅鑼灣煤氣公司Towngas Avenue
離遠喺對面馬路已經見到大大個Snoopy易拉架喺門口喇～
今次嘅活動因為參加人數踴躍，所以要分兩批進行煮食活動～
我哋係第二批，所以先食下嘢先喇～
食下嘢，玩下遊戲～ 好快就到第二組喇～
要煮食～ 梗係要做足準備喇～ 洗哂手，著好圍裙先！
唔止小朋友㗎～ 大人都一樣有圍裙著～
今日整嘅嘢食係曲奇餅～
嘩！對Yuki嚟講簡直係駕輕就熟喇～ 因為佢同Mommy都整過唔少次喇～
餐廳已經預先分配好哂麵粉，牛油，糖粉～ 倒埋一齊就可以開始搓喇～
Yuki基本上唔使大人出手呀～ 自己搓得幾開心！
直到搓得開始實喇～ 就唔係太夠力要Daddy落手幫幫！
話都無咁快～ 搓好喇～
搓成一舊就啱喇～
然後開始用手壓平佢～
再落少少麵粉喺面～ 等一陣用棍轆果陣無咁易痴住～
Yuki轆得有板有眼～ 果然平時係Mommy整曲奇、蛋糕嘅小幫手！
壓平之後用啲模壓啲曲奇出嚟～
完成喇～ 有星星、有豬豬、有兔兔、有米奇～ 寫好個名就俾廚師幫我哋拎去焗～
等緊焗嘅時候，喺走廊影下相～
好喇～ 姐姐分配啲食物盒，即係話差唔多焗好喇～
新鮮出爐嘅曲奇呀！ 好香呀！
先俾大家睇下半製成品先～ 係呀！未整完㗎～ 仲有下半部份～
呢啲就係下半部份要用嘅材料喇～
有白朱古力漿、士多啤梨漿、糖碎～
嘩！總廚叔叔出嚟教我哋喇～
佢教我哋可以用糖漿當膠水然後痴啲糖碎，或者用果啲唧出嚟嘅朱古力畫公仔～
總廚叔叔就示範畫米奇俾我哋睇～
到小朋友自己整喇喎～ Yuki先整個Mickey先！ 痴咗兩粒眼仔，跟住痴咀仔～
然後好專心咁畫隻兔仔～
專心到Daddy都唔敢叫佢望鏡頭呀！
搞掂！ 靚唔靚先？
大家都好投入咁為自己作品裝飾～
Yuki嘅全盤作品展示～
最後Snoopy仲出嚟同我哋一齊合照呀～
多謝大家請Yuki出席呀！ 下次我哋會繼續捧場㗎～
