一早瞓醒，望出酒店房窗外～ 嘩！個天好清呀～
因為我哋住嘅係High 1 CC hotel，其實係屬於高爾夫球場果邊，所以要搭返穿梭巴士約十幾分鐘返過Ski House果邊～ 本來都想住滑雪場旁邊嘅condo，但係因為呢個聖誕假期實在太搶手喇，condo完全無房，所以袛好住去High 1 CC hotel囉～
咁早嚟到Ski house仲係好少人下～ 可以鍾意點影都得～ 呢隻好似狗嘅公仔係High1嘅代表物～
今次都唔記得咗同Yuki砌雪人添～ 咁同呢隻雪人公仔影相代替喇～
Valley Ski house裏面有兩間快餐店：KFC同埋Dunkin’s Donuts. 我哋都係鍾意Dunkin’s Donuts個火腿芝士包多過一早食炸雞～
今次係我哋第一次學ski，所以Daddy一早就book咗一個group lesson！ 由一個instructor教我哋三個，四小時課程～ 因為一早約定，所以安排到一個識英文嘅導師俾我哋～
上堂之前先去租好所需裝備先喇～
本來我哋check-in酒店時送咗啲coupon俾我哋租器材有discount～ 但係出咗發到ski house先醒起放咗喺酒店唔記得拎～ 但係穿梭巴士又成一個鐘先一班～ 想搭返去酒店拎都唔得～ 算喇，唔會因此影嚮我哋興奮嘅心情～
教我哋嘅導師係一個姐姐嚟㗎～ 佢英文唔算係好流利，不過最緊要我哋聽得明佢講乜就得喇～
因為Daddy都係學生之一，所以袛能偷偷地影咗幾幅相咋～
一如所料，學習進度以學緊溜冰而本身又重心低唔易跌嘅Yuki學得最快喇～
好快已經做到行、Ａ字停、左轉、右轉～
上緊堂嘅時候最攰就係每次滑咗落嚟都要自己一步一步咁爬返上斜坡頂，呢個動作應該係運動量最大嘅一個動作～
我哋由朝早十點半開始上堂，先上兩個鐘～ 午膳同休息過後，下午再繼續餘下嘅兩個鐘～
呢個咁攰嘅時候當然就需要高熱量嘅炸雞喇！ Yummy!
嗱！都話呢度好free㗎喇～ 唔止啲器材週圍擺～ 連食嘢都係隨便地下有位就坐低喺地下食㗎咋～
食完個餐Yuki仲有餘力，仲去便利店買多包士多啤梨奶飲添～
下奏繼續練習多啲左右轉～ 同埋姐姐開始要我哋做啲連續動作～ 例如：左轉右轉加左轉
練下練下，終於Daddy Mommy都做到喇～
時間亦差不多～ 導師姐姐知道我哋聽日都會自己嚟滑雪，話可以坐lift滑初學者果條slope，唔駛驚慢慢滑落嚟～
唔該哂呀，姐姐！
喺呢度要特別鳴謝Joyce姨姨借出滑雪鏡俾我哋呀～ Thank you, Joyce姨姨！
另外，呢個group lesson真係無報錯～ 因為一對三，可以跟得好好多～ 見到練習區其他有啲旅行團上堂應該係一對二十以上，個導師一個鐘裏面可能袛係跟得你幾分鐘～
今日另外一推動住Yuki上堂嘅動力就係尋日玩過返尋味嘅滑雪兜嘞～
因為Mommy應承咗Yuki今日會俾佢再玩一次嘛～
睇下Yuki舉高手幾開心～
Yuki玩滑雪兜原來已經好乖呀～ Mommy尋晚都有講話Yuki尋日玩到尾見Mommy攰就拉住Mommy，同埋自己拉上斜坡自己滑落嚟～
今日Daddy見識到喇～ 先嚟一幅預備姿勢！
好喇！ 上山喇！ 單手拎兜，幾純熟！
Hoo… Ha! 衝呀！ Hello, Daddy!
Yuki！小心撞親Daddy呀～
嗱！睇片就見到如果唔係Daddy起身走位真係會衝過嚟㗎～
Yuki落雪兜即刻向Daddy salute, say sorry… Ha Ha!
帶住疲倦嘅身軀離開滑雪場，搭車去搵嘢食喇～
呢晚我哋決定去最近滑雪場嘅火車站－古汗站附近搵嘢食～ 之前搭穿梭巴士經過見到好似都幾熱鬧咁～
一路行，見到都幾多餐廳～ 唔少係韓式燒烤～ 我哋見到呢間都幾多人幫襯，應該無乜錯～
不過唔記得影餐廳名，袛係影低咗個門口好特別，用個夾炭嘅夾嚟做把手～ 如果大家有興趣想搵的話，就憑夾覓舖喇～
入到嚟坐底，全部客人都係韓國人～ ＯＫ！無揀錯～ 咁多韓國人都幫襯，一定唔會差喇～
不過呢，成幅牆嘅餐牌完全睇唔明～ 好彩有個好似老闆娘嘅姨姨自動行埋嚟問我哋：beef? pork?
我哋即時應：yes! beef and pork!
好嘢！ 好快有得食喇～
借下面呢幅相，不得不讚下Yuki宜家愈嚟愈生性同乖呀～ 幫我哋派好筷子之餘仲幫Mommy斟水添喎！
姨姨夾咗塊燒紅咗嘅炭過嚟喇～ 即刻成個位都暖哂～
啲肉嚟到喇～ 二話不說，放哂上去燒先～
原來韓國呢度嘅燒烤係興燒厚切㗎～ 豬肉直頭好似成塊豬扒咁上～ 俾埋把較剪你，燒到咁上下，自己剪細佢～
Yuki, 你就好喇～ 嚟韓國第四日已經食兩次你最鍾意食嘅燒肉肉喇！
好嘞！ 食飽又係時候返酒店早啲休息預備聽日自己滑雪喇～
今晚剛好係平安夜，返到酒店等Yuki瞓著左～
Daddy聽到窗外好大風聲～ 撥開窗簾見到原來落好大雪呀！ 地下已經落到白哂～ 仲有啲住客特登行出去聖誕樹度影相添～
有呢場雪迎接平安夜，呢一晚過得好有聖誕氣氛！
沒有留言:
發佈留言