呢日我哋瞓到自然醒～
到可以出發離開酒店都已經十一點喇～
回到首爾後，天氣依然好凍～ 俾大家睇下零下幾度嘅天氣應該點樣著先可以保暖喇～
重點係將皮膚暴露於空氣嘅面積盡量減低～ 睇下Yuki戴手套、帽、耳套、帽面巾～ 袛係露出對眼仔睇路～ 原來遮住口鼻都好重要㗎～ 因為每一下呼吸啲空氣都暖好多～
咁今日嘅行程到底係去邊呢？ 就係去另一個主題公園－－「愛寶樂園」喇～
嗱！如果大家想自己搭車去愛寶樂園，要留意下喇～ 因為好多網頁同旅遊書所教嘅巴士路線最近改咗～
以前大部份係教大家去搭地鐵去「蠶室」站，然後轉搭巴士５８００號去愛寶樂園～
原來宜家巴士５８００號已經變左５７００號～ 巴士站就無變～ 依然係出地鐵站對面果個馬路邊巴士站～
去愛寶樂園個網站最穩陣：愛寶樂園交通
往愛寶樂園路程都唔短～ 要成個鐘車程～
當巴士逐漸遠離首爾，見到路上嘅積雪愈來愈多～
終於目的地在望喇～ 愛寶渡假村！
落咗巴士先發覺原來巴士唔係直達愛寶樂園入口㗎～ 哈哈！
仲要轉多一程愛寶樂園嘅穿梭巴士先得～
可能由於天氣凍嘅關係，都幾少人入場～
我哋買飛入場時，個姐姐仲提醒我哋有啲設施會唔開㗎～ 下面呢個表就列明咗由零度至零下十度分別邊啲嘢會唔開嘅～
入到嚟咁空曠，感覺仲凍～ Yuki戴埋Mommy今朝新送嘅粉紅冷帽，加埋太陽眼鏡～ 露出嘅皮膚得返一兩吋！
睇下啲聖誕花被雪遮咗大部份～
今日嘅相要大家多多包涵～ 全部都係懵面超人Yuki Lam~ 搵人假扮都唔知，哈哈！
為咗證實真身，我哋先嚟交功課，俾一幅真面目全家福～
愛寶樂園面積好大～ 大部份面積都係露天嘅～
不過又唔係完全要自己行嘅～ 好似呢個吊車雖然短短哋，都可以慳返啲腳力嘛～
有無發覺啲相裏面個影咁長嘅呢？ 係呀！因為我哋入場時間晏咗少少～ 所以食過飯，行兩行已經三點喇～
人少少其中一大好處就係鍾意點影相都得～
呢個摩天輪咁高，睇怕咁凍都無乜人坐啦～
唔單止Yuki教大家懵面保暖法～ 連Mommy都展示俾大家睇點樣收剩一條線夠睇路就得～
雖則話好多設施都唔開，好彩Yuki最鍾意嘅旋轉木馬依然正常開放～
本來已經靚嘅聖誕裝飾，加上被真雪包圍，聖誕氣氛爆哂燈！
行攰咗～ Yuki小朋友隨便搵個樓梯坐低休息下先～
Yuki～ 呢個咁凍嘅Boxing Day難忘嗎？
喺室外行得咁上下，都係搵間餐廳入去飲返杯熱朱古力先喇～ 又有得飲又有得暖手，雙重享受呀！
下午五點半，月亮已經靜悄悄出咗嚟喇～
咁暗嘅環境下，Yuki幫Daddy Mommy影相都無手震喎～
愛寶樂園最後一個節目，就係入呢個兒童室內遊樂場喇～ 每節四十分鐘～ 要預先攞定下一場嘅入場券先有得入㗎～
有少少似香港嘅Playtown~ 但係又似唔哂～
呢啲爬高爬低同滑梯就似喇～
但係另外一邊整個區域就模擬森林環境同動物～
獅子座女騎獅子！
雖然同其他小朋友語言不同，但係Yuki都玩得好開心喎～
玩完行返出室外個天已經黑齊喇～
著哂燈嘅樂園又有另一種氣氛喎～ 不過入黑天氣更凍，都係時候走喇～
回程都係坐返５７００號巴士～ 返到蠶室站已經八點幾～
巴士上嘅氣溫顯示係零下九度，印證咗今日係幾凍～
夜晚嘅路邊開咗好多小食檔～
檔檔都出哂煙～ 好似好吸引咁～ 不過我哋都係快啲返酒店附近食飯跟住休息喇～
返到明洞，Daddy建議一試韓國有名嘅人參雞～
呢間「百濟蔘雞湯」，已有四十幾年歷史～
好多電視台都訪問過～ 包括韓國、日本、台灣嘅電視台～
呢啲暖爐真係少見呀～ 方圓幾張枱距離都感受到啲熱力～ 以前喺日本見過類似嘅暖爐仲可以放茶壼喺頂煲茶添～
嗱！無你哋㗎！ 鏡頭一轉我哋已經除哂啲外套呀、頸巾呀、帽呀～
好嘢！我哋啲嘢食嚟喇～
一隻普通人蔘雞，另一隻烏雞人蔘雞～
啲雞煲得好淋～ 裏面仲釀咗啲糯米飯～ 咁凍嘅天氣食真係倍添滋味～
但係唔知夏天三十幾度食會點呢？
食飽飽，行幾條街就返到酒店喇～
＊＊＊
不過今日仲有一樣值得記低嘅事～
就係呢幾次旅行，我哋都會俾Yuki寄啲明信片俾親戚朋友～
呢兩三日一直幫Yuki留意住都唔覺邊度有喎～
今晚返酒店諗住問下接待處哥哥酒店有無明信片喇～ 平時通常房裏面果疊嘢都會有一兩張㗎嘛～
點知哥哥話無㗎～ 然後過兩秒，佢話叫我哋等等喎… 跟住就入住去辦公室～
出嚟時手上拎住一盒好精美嘅嘢～ 佢話送呢盒明信片俾我哋呀！ 無得賣㗎～
真係多謝哂呢位哥哥呀～
沒有留言:
發佈留言