終於到咗呢個韓風之旅嘅最後一日喇～
起身收拾好行李，先check-out咗先～ 然後放低行李嚮酒店～
去到最後一日喇，但係我哋仲未買手信呀！
近近地過隔離嘅樂天百貨睇下有無嘢買得到先～
過到嚟先發覺原來早得滯仲未開門呀～ 十點半先開門㗎～
樂天免稅店門口有個韓國星光大道，有好多明星嘅掌印喎～
仲有呢啲高過真人嘅大海報，可以同明星影合照呀～
Yuki同呢個唔知叫咩名嘅明星呢？
等到十點半終於有得食早餐喇～ 簡簡單單嘅麵包加杯咖啡～
Hello Yuki! 你又食緊乜嘢呢？
韓國嘅百貨公司都係好似日式百貨一樣，有好多嘢食嘅檔～
有好多「阿朱媽」叫我哋試食呀～
呢個餅裏面有包啲紅荳呀，花生呀！ 好似幾好味咁喎～
呢啲又好得意喎～ 係將啲好似魚蛋嘅嘢掃到好薄咁一層，然後捲喺啲香腸呀，韓國年糕嘅外面～
另外Mommy又上咗免稅店果層買啲化粧品～ 嘩！好多人呀！
買完嘢返酒店放低啲手信先～ 點知Yuki小妹妹扭計喎～
唔知係咪未瞓夠呢？ 仲伏喺Mommy度詐嬌喎～
我哋搭夜晚嘅機，所以都仲有成個下奏可以行下嘅～
本來其實想去下果堆大學區，例如梨大之類～但時間話多唔多，唔去得太遠～所以揀咗近啲嘅仁寺洞行喇～
仁寺洞有好多藝廊畫廊～ 人少少都幾好行㗎～
一出地鐵站街口就有啲藝術雕塑～
相比起明洞，呢度悠閒好多！
鍾意點影就點影～
麵包店內有啲好吸引好多cream嘅麵包呀！
行行下，收咗太陽～ 即刻凍咗～ 收返埋啲耳口鼻先啦～
最後一日嘅午餐，我哋選擇韓國餐～ 從芸芸特色餐廳裏面，我哋揀咗呢一間～ 仲有個窗邊位添～
小小餐廳裏面，大概有十張八張枱～ 除咗我哋就袛有另外一張枱嘅客人～ 好靜、好舒服呀～
有嘢食喇～ 本來諗住三個人叫兩樣嘢ＯＫ喇～ 點知份量咁大！
一個韓式海鮮薄餅、一個韓式炒牛肉粉絲～
兩碟嘢都有成個pizza咁大㗎！
但係又好好味喎～ 所以食完好飽呀！
呢間舖頭有乜咁特別要影呢？
因為佢其實係Starbucks嚟㗎～ 第一次見有外國Starbucks唔係用英文做招牌播！
繼續美食分享先！
呢樣好新奇嘅，成支士的(stick)咁嘅樣到底係乜嚟呢？
睇見後面果部機，可能大家都估到嘞～
其實係軟雪糕嚟㗎～ 不過支脆脆筒變咗做呢支脆卜卜嘅士的～ 個哥哥會塞支筒入去唧雪糕條喉度～ 然後將雪糕唧滿成支士的～
哈哈！ 好得意！
返返明洞，逛多一陣之際，居然聽到一把好熟悉嘅聲音！ 原來係譚校長呀！佢又嚟咗首爾喎！
佢喺微博擺出嚟張相仲見到我哋三個添～
（相片摘自譚詠麟微博）
好喇！係時候要同首爾講拜拜喇～
呢間酒店真係好方便，返機場都係酒店門口個巴士站搭車～
個多小時嘅車程，到達機場～
最後衝剌！Mommy又有嘢買～ 買嘢仲有得抽獎！
等Yuki出馬！伸手入去睇下抽到咩色嘅波波？ 點知唔夠高，抽極都抽唔到～
最後要麻煩姐姐抱起Yuki先抽得到咋～
除咗抽獎，仲可以同呢間糖果屋同bear bear熊影返張相添㗎～
到此，七日嘅韓風之旅亦都結束喇～
呢次嘅雪遊世界系列亦暫告一段落～
期待下一次！唔知下次目的地係邊呢？
沒有留言:
發佈留言