盆菜夜宴@學校

尋晚Yuki學校舉辦咗開校以嚟第一次嘅盆菜宴～

呢個由家長教師會籌辦嘅盆菜宴，可以俾學生同家長一齊出席～ 大家好踴躍報名～ 總共有超過五十圍！

地點就喺學校嘅有蓋操場～ 嘩！ 第一次見到學校開咁多枱喺度呀！

Yuki咁啱被編排同好朋友汶錡一齊坐呀～

每一圍枱大約有四個家庭～ 我哋坐呢張就有兩個１Ａ班，兩個１Ｂ班嘅小朋友嘞～

每一枱嘅盆菜一早擺好哂喺枱面～ 開始食之前先唔好揭開面頭張錫紙，點著火爐，將個盆菜全盆返熱到出煙～

夠熱喇～ 就可以打開錫紙～ 嘩！有好多材料呀！

有好大粒嘅魚蛋、蝦、蠔豉、螺片，豬肉、魷魚、豬皮、枝竹、蘿蔔。。。

除咗食之外，當然仲有其他節目喇～ 睇下Yuki手上嘅抽獎券！ 總共有幾十份獎品㗎～

Yuki左右兩邊就係佢宜家同班嘅好朋友：樂童同汶錡～

 

今晚嘅抽獎形式係由中獎者再抽下一個中獎號碼！

啲獎抽到七七八八，１Ａ班都未有喎～ 有喇，有一個１Ａ同班同學好好彩呀！佢被抽中之餘再抽下一個居然又係佢自己嘅號碼呀！（因為每人可以有幾張抽獎券㗎～）

去到最後十個獎左右時，忽然間聽到１９９號－１Ａ班 林穎雪！

嘩！ 抽中我哋呀！

司儀仲話要家長一齊出嚟呀！ 因為件禮物好重又有玻璃㗎～

最奇嘅嘢跟住就發生喇～

當Yuki再抽下一個中獎號碼～ 咦！居然。。。係同班嘅！ 仲要。。。係坐佢隔鄰嘅汶錡呀！ 簡直係好似識變魔術咁呀！

班主任張老師都過嚟祝賀呢兩個幸運兒呀～

抽埋最後果幾個獎品，呢個盆菜晚宴亦都結束喇～

至於抽中嘅禮物係咩嚟嘅呢？ 今朝拆開咗喇～ 就係呢部二合一燒烤加火鍋機嘞～