昨天晚上果場雪帶來了聖誕老人給Yuki的聖誕禮物～
一早起床窗外已變成咁嘅樣～
同一日前比較，仿如兩個世界咁～
因為今日晏啲就要搭車返首爾，所以今朝先要check-out間酒店房先過去滑雪場繼續第二日嘅滑雪～
今朝嘅時間實在太趕喇～ 本來想搭果班穿梭巴士，可惜check-out需時，擔誤咗少少時間，到我哋衝出酒店時架巴士剛剛開出～ 我哋袛係爭一分鐘咋～
因為下一班要成個鐘頭之後，所以我哋即時決定叫酒店幫我哋call的士～
呢個失誤好似預告著今日不太順利咁喎～
。
。
。
到咗滑雪場，今日終於都有帶折扣券喇～ 先租滑雪器材，有六折～ 至於全日lift券就暫時未買住～ 因為我哋打算先自行練習一下，到再熟習啲可以控制隨時停同左右轉先～
如是者，我哋去練習區再練習尋日姐姐所教嘅動作～
來回行嘅大概兩次左右。。。
忽然之間。。。 有個小朋友耷低頭喊哂口咁同Daddy Mommy話：「我好攰呀！我唔滑喇！」
可能尋日加埋四小時嘅上課對Yuki嚟講用得太多體力喇，今日唔夠半個鐘就無哂電喇～
睇見Yuki個可憐樣～ 本來今日好大期望想坐lift再一嘗滑雪滋味，結果呢～
就係陪Yuki除低滑雪器材入返去休息喇～
好快地，Yuki就喺Daddy嘅大脾上熟睡起來～ 哈哈！
然後，Mommy出去滑幾個字，返嚟換轉Daddy又出去滑幾個字～
半日時間好快就過喇～ 還返哂啲器材拎返個喼，準備一陣間搭穿梭巴士上返山上嘅巴士站出首爾～
經過一朝補充睡眠之後，Yuki精靈返哂～
攬住啲企鵝影相～ 變得幾生猛～
Daddy頭戴嘅冷帽就喺滑雪場買㗎～ 好厚好夠暖～ 不過睇嚟返香港就無乜機會戴喇～
上到山上ski house，夠時間先食個午飯～ 然後Yuki等到佢第一日望到眼金金嘅機動遊戲：迷你海盜船～
呢㗎海盜船犀利囉～ 你得一個人玩佢都開，不過要KRW3000玩一次～ 即係港紙二十蚊左右～
一轉都玩成三分鐘有多～
另外仲有呢㗎傳統入錢騎公仔機～
下奏兩點，巴士出發喇～
要離開Yuki第一次滑雪嘅High1滑雪場喇～
離開時，再一次睇下呢啲ski house旁邊嘅condo屋～ 本來就係想住呢種屋㗎～ 希望下次有機會喇～
燦爛嘅陽光加雪景目送我哋離開喇～
如是者又經過三個鐘嘅車程，天都黑哂咁返到蠶室站～ 再轉乘地鐵返明洞酒店～
返到酒店都唔早喇～ 所以呢晚我哋就咁嚮酒店隔隣街呢間上次uncle Kim介紹過食石頭鍋烏冬出名嘅舖頭試下喇～
叫咗嘢食，Yuki好肚餓咁拎住個碗等食喎～
咦～ 係開放式廚房喎～ 見到有兩個廚師煮緊喇～
有得食喇～ 就係呢個石頭鍋海鮮烏冬～
同埋呢個石頭鍋飯（bibimbap)～ Yummy!
話咁快，得返兩日就要返香港喇～
記得留意住我哋跟住果兩日去邊度玩喇～
沒有留言:
發佈留言