經過第一晚喺飛機上面瞓得唔算太好，尋晚終於可以高床軟枕瞓返覺好㗎喇～
瞓醒覺又行過隔離明洞食早餐喇～
朝早行明洞見到有幾檔嬸嬸整呢啲唔知係咪叫「糖餅」呢？
ＬＩＮＥ唔單止喺手機界出現，現實世界都有呀！ 好大個聖誕版ＬＩＮＥ熊仔呀～
明洞其實食早餐嘅地方唔算好多～ 今朝我哋去咗Dunkin’ Donut~
俾錢買早餐時發現蛋糕柜有啲好搞笑嘅聖誕蛋糕呀～
係一系列聖誕老人倒插入蛋糕嘅造型嚟㗎～
食完個早餐就搭地鐵向我哋今日嘅目的地進發喇～
嚟到蠶室站就會見到好多指示牌㗎喇～ 無錯！今日就係同Yuki嚟到「樂天世界」～
各位記住帶定護照喺身呀～ 外國人有八折㗎～
嘩！ 真係好大呀～ 作為一個室內遊樂場，呢度真係超大～
因為有個巨大天幕包住，所以呢度唔似室外咁凍，我哋一入場就租locker鎖起一部份嘅大褸～
宜家Yuki識得一入到任何主題樂園都即刻去拎一張地圖睇下有乜嘅玩先～
不過呢日睇啱想玩乜嘢都未必有用，因為實在太多人喇～ 想排隊玩果個天花板熱氣球，居然要排兩個鐘（2Hrs）？
一定要改變策略嘞～ 玩啲每次可以放多啲人嘅遊戲喇～ 例如：旋轉木馬囉～
排咗十五分鐘左右就有得玩喇～
玩旋轉木馬時候嘅Yuki表現出好多笑容令Daddy Mommy諗返起ＢＢ時期嘅Yuki～
呢啲最自然、最天真嘅笑容，睇一千篇、一萬篇都唔會厭～
既然室內方面咁多人，我哋一於去室外果邊碰碰運氣喇～ 希望會因為凍，少啲人排隊玩喇～
室外呢邊真係比較少人～
先比我哋發現迷你摩天輪～ 見唔見到？ 係唔駛排隊呀～
呢個摩天輪同海洋公園果個好類似～ 迷你版嘅好處係好快就可以玩完落嚟玩第二樣嘢～ 唔似得十幾二十層樓高果啲隨時要半個鐘以上第玩一個圈～
唔止摩天輪少人呀，隔離嘅迷你海盜船都好少人喎～
趁未坐滿，Yuki上去霸個位先～
嘩～ 迷你海盜船都可以幾剌激㗎喎～ Yuki玩完一次之後就…上咗癮～
一落嚟就即刻再排隊玩過～
今次坐唔同嘅位置～
之後再玩～
然後… 又再玩！ Daddy已經記唔到Yuki總共玩咗幾多次～
連隔離個韓國人姐姐都話「嘩！乜你玩唔厭咗嘅咩？」哈哈！
不過Daddy Mommy完全任由Yuki想玩幾多次就玩幾多次～ 難得呢樣遊戲Yuki咁鍾意，最緊要其實係Yuki玩得開心就夠喇～ 兼且其他室內嘅遊戲又要排咁耐隊～
終於過咗唔知幾耐…終於都玩完海盜船嘞～
再週圍行下，影下相喇～
咦～ 有樣好新奇嘅小食喎～
呢樣叫Funnel Cake嘅係乜嘢呢？ 排隊買嚟睇下喇～
原來係一種即叫即炸嘅甜點～ 個底餅係好似整打邊爐唧唧魚麵咁，唧啲餅條落炸鍋度，然後炸到金黃色撈起加糖粉，士多啤梨同忌廉就完成～
因為無影到製作過程，嚮網上搵到啲片段俾大家睇下喇～
喺室外真係好凍下～ 所以食埋個funnel cake，我哋都係返入室內場嘞～
呢架單軌火車比熱氣球排隊時間短，話一個鐘頭～
好彩排咗半個鐘左右就到我哋上車喇～
由上面望落去，棵聖誕樹變得好細～
由火車落返地面，剛剛有巡遊表演喎～
除咗巡遊花車之外，仲有兒童合唱團～
之後仲有銀樂隊演奏～
呢棵就係頭先果棵聖誕樹喇～
Yuki宜家揸大單鏡機都夠力㗎喎～ 呢幅幫Daddy Mommy影嘅合照無手震㗎～
再麻煩隔離影完相嘅一個哥哥幫我哋影幅合照添喇～
就係咁就完成我哋第一次嘅樂天世界體驗喇～
今晚又有另一個約會～ Daddy約咗佢另一個韓國人舊同事－Uncle Kim～
佢帶我哋去食咗一間韓式燒烤黑豚肉～
不過食完先發覺唔記得咗同uncle Kim影相呀～
食完飯見時間尚早，我哋再喺明洞夜市行下街喇～
聖誕氣氛嘅頭飾，同埋紅鼻子～ 紅鼻子扮乜？ 咪扮Rudolph the red-nosed reindeer囉～
Yuki好專心咁睇緊呢檔喎～ 好似係用嚟扣喺袋嘅裝飾～
隨著Yuki日漸長大，兩母女身高逐漸拉近～ Mommy搭住Yuki一齊行時，兩個歩姿一致，想走散都幾難～
明洞夜晚街頭真係好多嘢食～ 不過我哋剛剛先食完晚飯，實在食唔落喇～ 但係都影低同大家分享下喇～
沒有留言:
發佈留言