2008 仲夏關西關東北國走透透之旅 - 返黎啦~

十三日既旅程好快就結束啦，尋晚我地差不多１０點落機，四個幾鐘頭既飛行時間，我全程都好精神，不過，當坐上的士回家途中，終於瞓著左，返到屋企，涼又無沖，奶又無食，就咁瞓到五點幾先醒一醒，灌左支奶又再瞓。

至於 Daddy Mommy，就忙於執行李，所以未有時間上黎 update。

好啦，等我為我呢次第二次既日本之旅，做個總結先。

關西：去左大阪同神戶兩個地方，不過天氣實在太熱，夏天一定唔會再去 。
關東：我地只係東京住左３晚，去左迪士尼同麵包超人館，兩個地方我都好鍾意，玩得好開心。
北國：夏天既北海道真係好靚，我第一次見到花海，好鬼興奮。我仲去左小樽水族館同旭山動物園，總之係好好玩。

全個旅程我都好開心，總共搭左四 c次飛機，除左由香港飛去大阪果程之外，其餘三程飛機，我都有位坐，Mommy 又預備左好多貼紙啦，barney video 啦，玩具啦，所以係飛機都無乜大扭計，算好乖乖。當然成個旅程入面，梗係有曳曳既時候，仲激到 daddy mommy 紮紮跳，不過情況尚可，應該都仲有下次既，嘻嘻！

Daddy 話總共影左差不多二千張相，所以需要Ｄ時間黎整理下。Mommy 就話要睇我呢幾日乖唔乖，佢要等我瞓左先有得寫網誌，會儘快喎。